Узнагародзіць палітыка прапанаваў міністр замежных справаў Польшчы Радослаў Сікорскі.
Сёлета ў Польшчы была адноўленая прэмія «Салідарнасць» імя Леха Валэнсы, яе лаўрэатам стаў намеснік Святланы Ціханоўскай, кіраўнік Народнага антыкрызіснага ўпраўлення Павел Латушка, паведамляе Міністэрства замежных справаў Польшчы.
Узнагарода будзе ўручаная на ўрачыстай цырымоніі 18 верасня ў Варшаве. Прысуджэнне сёлетняй прэміі Паўлу Латушку было прапанаванае міністрам замежных справаў Польшчы Радославам Сікорскім, які праінфармаваў пра гэта беларускага палітыка ў ініцыяванай міністрам тэлефоннай размове.
Прэмія прысуджаецца МЗС Польшчы на знак прызнання заслугаў у прасоўванні і падтрыманні дэмакратычных каштоўнасцяў. Сёлетняя пастанова была прынятая аднагалосна капітулай, у якой старшынюе лаўрэат Нобэлеўскай прэміі міру Лех Валэнса і ў склад якой уваходзяць таксама міністры замежных справаў, юстыцыі, культуры Польшчы, старшыня Польскага Хельсінкскага фонду правоў чалавека і старшыня фонду «Інстытут Леха Валэнсы».
,,«Успрымаю гэта як важны палітычны мэсідж з боку Польшчы наконт стратэгічнага падтрымання дэмакратычных памкненняў беларусаў, – пракаментаваў узнагароду Павел Латушка. – Адначасова гэта прызнанне дзейнасці ўсёй нашай каманды, якая вядзе барацьбу за свабодную, дэмакратычную, еўрапейскую і незалежную Беларусь, і ўсіх беларусаў, хто змагаецца за свабоду для беларускай нацыі. Гэта вялікі гонар, але гэта і вялікая адказнасць. Важна, што яе з намі гатовыя падзяляць нашыя партнёры, нашыя саюзнікі. Мы змагаемся з дыктатурай, мы змагаемся за Беларусь – і мы не адныя».
Лаўрэатам прэміі «Салідарнасць» можа стаць толькі асоба, якая дзейнічае ў духу міжнароднай салідарнасці і робіць унёсак ва ўмацаванне дэмакратыі і грамадзянскіх свабодаў у свеце. Прысуджэнне прэміі арганізацыям немагчымае.
У 2014 годзе лаўрэатам прэміі стаў Мустафа Джэмілеў, украінскі лідар барацьбы за правы крымскіх татараў, які неаднаразова намінаваўся на Нобэлеўскую прэмію міру. У 2015 годзе – Жанна Нямцова, журналістка, дачка расейскага апазіцыянера Барыса Нямцова.
Марыя Міхалевіч belsat.eu
