«Белсат» аналізуе вынікі чарговага тыдня поўнамаштабнай вайны
«Белсат» аналізуе вынікі чарговага тыдня поўнамаштабнай вайны, распачатай Расеяй ва Украіне. Пра становішча на фронце на дзень 29 ліпеня чытайце ў нашым матэрыяле.
На поўначы Харкаўскай вобласці цягам апошняга тыдня працягваліся баі ў ваколіцах Глыбокага і Старыцы, а таксама на тэрыторыі Ваўчанску і яго ваколіцаў. Прарасейскія крыніцы пішуць, што Узброеным сілам РФ, нягледзячы на сталыя атакі з боку праціўніка, удалося ўтрымаць пазіцыі ў Глыбокім і ўсталяваць поўны кантроль над сялом у яго адміністрацыйных межах.
У сваю чаргу праўкраінскія тэлеграм-каналы паведамляюць, што расейцы на гэтым участку паступова назапашваюць сілы для далейшага правядзення штурмавых дзеянняў.
У Старыцы баі лакалізуюцца на паўднёвых ускрайках, але пакуль украінскім вайскоўцам не ўдаецца замацавацца, бо праціўнік трымае тэрыторыю пад агнявым кантролем за кошт нанясення ўдараў з вышыняў на поўначы ад сяла.
У Ваўчанску асноўныя баявыя дзеянні ідуць у раёне шматпавярховай забудовы, а таксама на тэрыторыі Агрэгатнага заводу. Ёсць паведамленні, што за апошні час Збройным сілам Украіны ўдалося вярнуць частку пазіцыяў з поўначы ад ракі Воўча, аднак агульная сітуацыя ў горадзе істотна не змянілася.
Такім чынам на паўночным фронце УС РФ па-ранейшаму паспяхова стрымліваюць сілы праціўніка, якія раней былі тэрмінова перакінутыя з іншых участкаў. Такая тактыка дазволіла расейцам істотна аслабіць абарону ЗСУ на стратэгічнага больш важных кірунках.
На паўночным усходзе Украіны ініцыятыва застаецца за расейскімі вайскоўцамі, якія ціснуць па ўсёй лініі сутыкнення, імкнучыся выявіць слабыя месцы ў абароне праціўніка. Асноўныя заданні на абодвух кірунках, купянскім і ліманскім, – выціснуць Збройныя сілы Украіны на захад за рэкі Аскіл і Жарабец. Праўкраінскія крыніцы прызнаюць, што на асобных участках войскі РФ маюць лакальныя поспехі, але пры гэтым пакуль ЗСУ ўдаецца кантраляваць сітуацыю, што найперш дасягаецца за кошт ужывання ўдарных дронаў, якія знішчаюць лагістыку праціўніка на адлегласці да шасці кіламетраў ад лініі сутыкнення.
Падобным чынам выглядае сітуацыя ніжэй па фронце – на сівэрскім і краматорскім кірунках у паўночнай частцы Данецкай вобласці. Прарасейскія тэлеграм-каналы заяўляюць пра невялікі рух на асобных участках фронту, у прыватнасці на поўначы ад Часавага Яру, але гэтыя поспехі пакуль ніяк не ўдаецца развіць да сапраўднага прарыву абароны праціўніка. Пры гэтым адзначаецца, што ініцыятыва войскаў РФ у першую чаргу звязаная з перавагай іх у жывой сіле.
У больш складаным становішчы цяпер Сілы абароны Украіны ў цэнтральнай частцы Данецкай вобласці.
На тарэцкім кірунку (ваколіцы аднайменнага гораду) па-ранейшаму захоўваецца пагроза атачэння ЗСУ на ўчастку паміж Нью-Ёркам і Паўднёвым.
У гэты ж час на суседнім, пакроўскім кірунку расейцы ў сярэдзіне мінулага тыдня атачылі групоўку ўкраінцаў у ваколіцах Прагрэсу. Рух УС РФ на гэтым участку чытаўся загадзя, бо ім было неабходна расшырыць зону кантролю пасля ранейшага прарыву да сяла Ваздвыжанка. Паводле аналітыкаў праекту «Deepstate», у выніку вайскоўцам ЗСУ ўсё ж удалося выйсці з боем з атачэння без стратаў у асабовым складзе, але факт стварэння такой сітуацыі сведчыць пра істотныя праблемы ва ўкраінцаў.
Правал на гэтым участку ў далейшым прывёў да захопу суседняга да яго сяла Воўча. Акрамя гэтага, расейцы працягнулі рухацца на захад уздоўж чыгуначнай лініі да Навагродаўкі і выйшлі да ўскрайкаў Іванаўкі і Вясёлага.
Ніжэй па фронце Узброеныя сілы РФ захапілі Яўгенаўку і амаль занялі Навасёлаўку Першую.
Яшчэ далей на поўдзень, паводле ўкраінскіх вайскоўцаў, Збройныя сілы адышлі з сяла Яснабродаўка, апасаючыся атачэння ўжо на гэтым участку фронту.
На курахаўскім кірунку войскі РФ узялі пад свой кантроль большую частку Краснагораўкі: пазіцыі ЗСУ захоўваюцца толькі на паўночна-заходніх ускрайках паселішча. Нагадаем: баі за горад распачаліся ў пачатку 2024 года.
На думку «Deepstate», агулам прасоўванні расейцаў у Данецкай вобласці звязаныя найперш з іхнаю татальнаю перавагай у жывой сіле.
Больш спакойнаю выглядае лінія сутыкнення на поўдні Украіны. На так званым урэмаўскім выступе на мяжы Данецкай і Запарожскай вобласцяў баі лакалізуюцца ў ваколіцах Уражайнага, але істотных зменаў пакуль не назіраецца.
Падобным чынам развіваецца сітуацыя і ў цэнтральнай частцы Запарожскай вобласці: тут расейцы працягваюць ціснуць у ваколіцах Арэхава, але пакуль маюць толькі лакальныя поспехі.
У Херсонскай вобласці трываюць баі ў астраўной зоне Дняпра.
Пры ўсім гэтым відавочна, што паўднёвы фронт для Узброеных сілаў РФ цяпер другасны, і сур’ёзныя змены тут на гэты момант малаімаверныя.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
