Сузаснавальнік крамы «Kropka» назваў гэта «правакацыяй лукашыстаў».
У сталіцы Літвы невядомы разбіў шыбы ў краме «Kropka» і напісаў па-літоўску «Вяртайцеся дадому, беларускія свінні». На месца выклікалі паліцыю. Сузаснавальнік крамы Зміцер Фурманаў у размове з «Белсатам» назваў інцыдэнт правакацыяй лукашыстаў і спробаю пасварыць літоўцаў і беларусаў.
Здарэнне адбылося ў ноч на нядзелю. Невядомы, які трапіў у аб’ектыў камеры назірання, разбіў шыбы і шкло ў дзвярах, а на самым будынку, дзе месціцца крама «Kropka», напісаў па-літоўску «Вяртайцеся дадому, беларускія свінні».
Пасля гэтага зламыснік зрабіў фота і ўцёк.
Сузаснавальнік крамы, былы палітвязень Зміцер Фурманаў сказаў «Белсату», што лічыць гэта правакацыяй лукашыстаў, нагадаўшы пра інцыдэнт з надпісам «Вільня наша» на помніку Міндоўгу:
,,«Гэта тыя ж самыя замоўцы, каб пасварыць паміж сабою літоўцаў і беларусаў. Насупраць нас ёсць рэстарацыя, у іх ёсць камера звонку, і там бачна, што асоба разбівае шыбы і потым фотае. Выглядае, як замоўленая правакацыя».
У надпісы на літоўскай мове аўтар дапусціў дзве памылкі, праўда, невядома, ці наўмысна:
,,«З паліцыяй быў перакладчык, ён заўважыў дзве памылкі ў двух словах. Не ведаю, ці адмыслова гэта зроблена».
З самой крамы нічога не знікла, акрамя разбітых шыбаў, іншай шкоды няма.
Фурманаў запэўніў, што здарэнне на працы крамы аніяк не адаб’ецца:
,,«Зараз мы можам надалей працаваць, мы прыбралі шкло. Перашкодаў для наведнікаў няма. Некаторыя замежнікі баяцца заходзіць, а ўсе беларусы адразу падышлі, выказалі падтрыманне, прапаноўвалі дапамогу. Але тут няма праблемы, самі дамо рады, усё будзе добра».
Надпіс пра «беларускіх свінняў» замалёўваць пакуль не будуць:
«Хай будзе пакуль, гэта як пазнака якасці, можа. Надпіс нам не перашкаджае, калі скажуць, што трэба прыбраць, замажам».
У «Kropka» прадаюцца сувеніры. Крама мае супрацу з майстрамі, якія вымушана пакінулі Беларусі пад пагрозаю палітычнага пераследу.
Сцяпан Кубік belsat.eu
