Падарожнікі незадаволеныя вялікімі чэргамі і «ўлезунамі».
Градус нянавісці да берасцейцаў расце: і без таго доўгае чаканне на мяжы робіцца яшчэ даўжэйшым праз «улезуноў» і гандляроў месцамі ў чарзе. Бальшыня такіх «бізнесоўцаў» – на аўтах з нумарамі першага рэгіёну. У Telegram-чатах абмяркоўваюць, як прыцягнуць улады да развязання праблемы, хочуць пісаць у адміністрацыю Лукашэнкі і клікаць на мяжу АМАП з ГУБАЗіКам.
Як толькі не называюць берасцейцаў, якія зарабляюць на мяжы. Жыхары рэгіёну возяць туды-сюды тавары, што можна выгадна прадаць або ў Польшчы, або ў Беларусі дзякуючы розніцы ў коштах. Калі стаяць содні ў чарзе, аніякай выгады не будзе, таму адзінае выйсце – абмінаць яе.
Калі чарга пачынае рухацца, аўты (пераважна зарэгістраваныя ў Берасцейскай вобласці) не падсоўваюцца, пакідаючы месца перад сабою. У такія дзіркі і ўціскаюцца «бізнес-партнёры». Акрамя таго, гэтыя месцы прадаюць ахвочым. Яшчэ бывае, што кіроўцы спрабуюць улезці, сцвярджаючы, што «я тут стаяў, проста ад’язджаў».
Вось і атрымліваецца, што бліжэй да шлагбаума нейкі рух ёсць, аднак да хваста чаргі гэты рух не даходзіць, бо месца, вызваленае аўтамі, што трапілі ў пункт пропуску, займаюць «улезуны».
«Беларусь – цудоўная краіна, аднак усе станоўчыя ўражанні знікаюць пасля стасункаў з прымежным быдлам. Зрабілі бязвіз, каб увесь свет пабачыў і даведаўся пра гэтых ушлёпкаў?» – напісаў адзін падарожнік.
Сумленным берасцейцам, якія, як усе, пакутліва стаяць у чарзе, параілі звярнуцца да дэпутатаў:
«Вы там маеце мясцовых дэпутатаў саветаў розных узроўняў. Схадзіце да іх на прыём. Яны маюць права накіроўваць дэпутацкія запыты ў адпаведныя інстанцыі. Агулам усіх берасцейцаў у чаце не зневажаюць, а толькі самых адметных».
Іншы карыстальнік упэўнены, што развязаць праблему можна сіламі аднаго толькі кіраўніка УУС Берасцейскага аблвыканкаму, які можа арганізаваць сталае дзяжурства перад «Варшаўскім мостам» работнікаў ДАІ, а таксама патрульна-паставой службы або АМАПу:
«Дадаткова берасцейскаму ГУБАЗіКу загадаць злавіць адмінаў Telegram-чатаў, дзе гандлююць чаргою, і завесці якую-небудзь крымінальную справу, падставы знойдуцца. Давесці да суда з рэальным тэрмінам аднаго – двух дзеячаў. Падаткавікі сваімі аператыўнымі захадамі могуць за дзень без высілкаў злавіць дзясятак гандляроў. І паралельна «Белмытсэрвісу» займацца пашырэннем зоны чакання і ўпарадкаваннем інфраструктуры».
Адна жанчына паабяцала, што напіша скаргу ў адміністрацыю Лукашэнкі.
«Вашая краіна запрашае еўрапейцаў з 35 краінаў наведаць з «бязвізам» і пабачыць на свае вочы, як жыве Беларусь, а тут сустракаюць 90-я, і «толікі» ў шлёпках прапануюць свае паслугі. Гэта не кажучы пра стаўленне да сваіх законапаслухмяных і прыстойных грамадзянаў, якія вымушаныя стаяць соднямі на мяжы. Здзіўленыя бяздзеяннем праваахоўных органаў, мясцовых чыноўнікаў, «Белмытсэрвісу», абыякавасці шмат якіх грамадзянаў. Дзе вашыя сілы правапарадку, падаткавікі, мясцовыя ўлады, дэпутаты ўсіх узроўняў, СМІ, папулярныя блогеры Беларусі? Чаму не асвятляюць і не развязваюць гэтую праблему?» – напісаў, як выглядае, замежны грамадзянін.
Яму ніхто не адказаў, што сілавікі занятыя палітычным пераследам і тымі, хто здымае чэргі на відэа, свабодных медыяў у краіне не засталося, а чыноўнікі і дэпутаты не ініцыятыўныя і дзеяць толькі пасля сігналу зверху. Зрэшты, пісаць пра гэта ў публічным чаце можа быць небяспечным.
Падарожнікі пры гэтым згадалі сюжэт, што паказала на выходных дзяржаўнае тэлебачанне. Прапагандысты абвінавацілі ў калапсе на мяжы суседзяў, казалі пра «польскае бязмежжа», не назвалі прычынаў закрыцця іншых пунктаў пропуску, прывялі заяву міністра замежных справаў Польшчы Радослава Сікорскага пра магчымае закрыццё мяжы і аніяк не згадалі тых самых «улезуноў», якіх у чатах называюць «толікамі».
25 ліпеня кіраўнік МЗС Польшчы не выключыў, што мяжа з Беларуссю будзе цалкам закрытая, бо «рэжым можа нам не пакінуць іншай магчымасці».
«Беларусь з надуманых падставаў пасадзіла еўрапейскі самалёт у Менску, каб арыштаваць дысідэнта, за што атрымала еўрапейскія санкцыі і ў выніку выйшла з пагаднення аб рэадмісіі. Цяпер колькасць нелегальных спробаў парушэння польскай, еўразвязаўскай мяжы крыху знізілася, але мы бачым, што рэжым расейскі, беларускі выкарыстоўвае гэта, уключае і выключае наплыў мігрантаў у адпаведнасці з нейкімі палітычнымі інструкцыямі. Так сябе не паводзіць добры сусед. Беларусь мусіць нешта зрабіць, каб палепшыць стасункі», – заявіў Сікорскі, адзначыўшы, што ў Менску ведаюць, што трэба зрабіць: вызваліць Пачобута і спыніць нелегальных мігрантаў.
У Telegram-чатах, дарэчы, заўважаюць, што адкрыццё іншых пунктаў пропуску палепшыла б сітуацыю на мяжы з Польшчаю, аднак ніхто не абвінаваціў суседнюю краіну ў тым, што яна нібыта проста так усё пазакрывала і пагражае цалкам спыніць рух.
Тым часам з’явілася інфармацыя, што аднаму прадпрымальнаму грамадзяніну, які прапаноўваў купіць месца ў чарзе, сёння разбілі нос:
,,«З разбітым носам пайшоў да міліцэйскага УАЗіка і паскардзіўся, што яго пабілі прыстойныя сумленныя людзі. У выніку прыйшлі двое ППСнікаў, пачалі пытацца, што і як, народ з сямі мужыкоў сказаў, што яго ніхто не біў, а ён сам упаў. І на гэтым усё».
Выглядае, пагроза не толькі быць пакараным штрафам за нелегальны гандаль, але і быць пабітым, пакуль не спыняе.
«Прыехаў у канец чаргі. І традыцыйна адразу ж паступіла прапанова праехаць наперад за $», – напісаў адзін падарожнік.
Людзі ў чарзе раяць месца не купляць:
«Хвост, не надумайцеся купляць чаргу, калі не жадаеце, каб вас з ганьбаю выштурхнулі з яе на заездзе ў зону чакання».
Паводле звестак Дзяржаўнага памежнага камітэту на 16 гадзінаў, выезду ў Польшчу чакае 350 аўтаў. Тыя, хто сёння мінуў мяжу, сведчаць, што на гэта спатрэбілася ажно 32 гадзіны.
У Тэрэспалі ў бок Беларусі надзіва пуста, толькі некалькі легкавікоў, хаця ў нядзелю чакалі 11 гадзінаў.
Аўтобусаў у Берасці цяпер 30, час чакання – каля 14 гадзінаў. Невялікая чарга сабралася і на тым баку, гэтым часам у Беларусь заязджаюць аўтобусы, што прыехалі ў Тэрэспаль апоўначы.
У «Каменным Лозе» налічылі 100 легкавікоў. Падарожнікі, якія сёння трапілі ў Літву, пішуць, што чакалі 17 гадзінаў. Шлях дадому з раніцы быў свабодны, мяжу міналі за 3,5 гадзіны, цяпер там назбіралася 60 аўтаў.
Аўтобусаў у бок Літвы зараз 7. Як сведчаць у чатах, час чакання сягае 10–11 гадзінаў. На шляху дадому давядзецца затрымацца на 4–5 гадзінаў.
Пасажыры сведчаць, што на памежным пераходзе перабоі з электрычнасцю – гэта наступствы моцнага ветру, і афармленне можа зацягнуцца.
У «Беняконях» – 100 машынаў. У чарзе давядзецца неяк бавіць каля 18 гадзінаў. У «Шальчынінкаі» ў бок Беларусі чаргі няма, мяжу мінаюць меней чымся за дзве гадзіны.
Аўтобусы ў Літву «пралятаюць» за дзве гадзіны, чаргі няма. Такі ж хуткі дагляд у зваротным кірунку.
У чарзе ля «Грыгораўшчыны» – 15 легкавых машынаў. Час чакання – каля чатырох гадзінаў. У бок Беларусі чаргі няма: на ўсё патрабуецца дзве гадзіны.
Сцяпан Кубік belsat.eu
