У наваполацкую калонію № 1 кожны дзень прыязджаюць прадстаўнікі менскай пракуратуры.
У наваполацкую калонію № 1 кожны дзень прыязджаюць прадстаўнікі менскай пракуратуры, якія прымушаюць палітвязняў пісаць прашэнні памілавання. Пра гэта паведамляе ПЦ «Вясна».
Паводле праваабаронцаў, прашэнне памілавання патрабуюць толькі ад тых палітвязняў, хто асуджаны на невялікія тэрміны.
Таксама вядома, што ў некаторых калоніях палітвязняў за адмову пісаць прашэнне змяшчаюць у ШІЗА, а некаторым пагражаюць новай крымінальнай справай паводле арт. 411 Крымінальнага кодэксу («Злоснае непадпарадкаванне патрабаванням адміністрацыі папраўчай установы»).
Мінулым тыднем радыё «Свабода» паведамляла, што прашэнне памілавання прапанавалі пісаць палітвязням магілёўскай калоніі № 15. Паводле звестак «Белсату», з аналагічным прапановамі ў другой палове ліпеня звярталіся да некаторых палітзняволеных у гомельскай жаночай калоніі № 4. Ва ўсіх выпадках гэта датычыла толькі тых, у каго тэрміны зняволення блізкія да завяршэння.
Як сцвярджае ініцыятыва «dissidentby», хваля збору прашэнняў памілавання ахапіла не толькі калоніі, але таксама турмы і ПУАТ. Паводле праваабаронцаў, шмат хто з палітзняволеных адмаўляецца пісаць прашэнне, нягледзячы на ціск.
Нагадаем, 3 ліпеня на волю паводле амністыі ці памілавання выйшлі 18 палітзняволеных.
Публічна адразу агучылі толькі імя лідара Партыі БНФ Рыгора Кастусёва, хворага на рак і асуджанага да 10 гадоў калоніі. Пазней сталася вядома, што на волю праз памілаванне з гомельскай жаночай калоніі выйшлі палітзняволеныя Дар’я Лосік, Святлана Лупач, Паліна Палавінка, Тамара Астрэйка і Кацярына Мадзянкова.
Глеб Нержын belsat.eu
