Пастанова прынятая «з улікам усіх абставінаў».
Аляксандр Лукашэнка пастанавіў памілаваць грамадзяніна Нямеччыны Рыка Крыгера, асуджанага на смяротнае пакаранне, паведамляе прэс-служба Лукашэнкі.
Пастанова прынятая «з улікам усіх абставінаў».
Аляксандр Лукашэнка абмяркоўваў гэтае пытанне на нарадзе 30 ліпеня. Тады ж сталася вядома, што Рыка Крыгер звярнуўся з прашэннем памілавання да Лукашэнкі.
Рыка Крыгера прызналі вінаватым паводле шасці артыкулаў Крымінальнага кодэксу і прысудзілі да смяротнага пакарання ў Беларусі. Згодна з версіяй абвінавачвання, ён нібыта ў кастрычніку 2023 года ўчыніў выбух на чыгуначнай станцыі Азярышча. Шкода ацэненая ў $516.
Лукашэнка на нарадзе наконт гэтага пытання казаў, што яму цяжка прымаць пастановы ў падобных справах, але трэба.
«Я хачу проста з вамі ў гэтым плане, можа, і параіцца. Але пачуць вашае меркаванне. Вы – людзі, непасрэдна датычныя да разгляду гэтай справы», – сказаў Аляксандр Лукашэнка.
Каб «параіцца», ён паклікаў кіраўніка КДБ Івана Церцеля, намесніка кіраўніка сваёй адміністрацыі Вольгу Чупрыс, прапагандыстку Людмілу Гладкую, а таксама Уладзіміра Горбача – адваката Рыка Крыгера.
Раней былі звесткі, што Рыка Крыгера хочуць абмяняць на афіцэра ФСБ Вадзіма Красікава, якога пакаралі пажыццёвым зняволеннем у Нямеччыне за заказное забойства.
Арсен Рудэнка belsat.eu
