Яго абвінавацілі ў «хайпе на ваенным канфлікце».
Вядомага тыктокера «Lexmask» з 58 тысячамі падпісантаў, які выпускае відэа на беларускай мове, а таксама ягоную жонку арыштавалі на 10 содняў адміністрацыйнага арышту, паведамляюць праваабаронцы.
У Менску 7 чэрвеня супрацоўнікі ГУБАЗіКу затрымалі Аляксея Бондара разам з ягонай жонкай Маргарытай. Тады ГУБАЗіК паведамляў, што затрымалі тыктокера за тое, што ён «хайпаваў на ваенным канфлікце».
На пакаяльным відэа Аляксей сказаў, што падпісаны на «дэструктыўныя каналы», а раней хадзіў на мітынгі.
Праваабаронцам стала вядома, што 8 чэрвеня ў судзе Фрунзенскага раёну Менска над Аляксеем і Маргарытай адбыўся суд. Аднак сваякам, якія хацелі прыйсці на паседжанне, адміністрацыя адказала, што «працэс будзе ў 18:00, таму на суд трапіць нельга». У выніку іх адправілі за краты на 10 содняў.
Алена Рувіна belsat.eu
