Верагоднымі краінамі называюць Нідэрланды і Данію.
Агенцтва «Bloomberg» высветліла, якія краіны выступаюць супраць сяброўства Украіны ў Еўразвязе. Верагоднымі краінамі называюць Нідэрланды і Данію.
Інфармацыйнае агенцтва сцвярджае, што азнаёмілася з дыпламатычнай нотай, у якой Данія заявіла, што Украіна недастаткова адпавядае крытэрам, звязаным са стабільнасцю інстытутаў, якія гарантуюць дэмакратыю, вяршэнства права, правы чалавека, павагу і абарону меншасцяў.
Урад скандынаўскай краіны мяркуе, што Кіеву трэба прынцыпова палепшыць сваю заканадаўчую і інстытуцыйную базу, каб дасягнуць прагрэсу ўва ўсіх гэтых сферах.
Данія перакананая, што Украіна цяпер на вельмі ранняй стадыі рыхтавання да таго, каб узяць на сябе абавязкі, звязаныя з сяброўствам у ЕЗ, і стварыць эфектыўную рынкавую эканоміку або стаць канкурэнтаздольнай на адзіным рынку.
«Bloomberg» зазначае, што ў леташнім рэйтынгу «Transparency International» Украіна заняла 122-е месца сярод 180 краінаў.
Большасць краінаў ЕЗ, у тым ліку Італія, падтрымліваюць заяўку. Паводле афіцыйных асобаў, знаёмых з ходам перамоваў, краіны, у прыватнасці Польшча, Літва і Ірландыя, хочуць, каб лідары ЕЗ прынялі рашэнне аб наданні Украіне статусу кандыдата.
Нагадаем, што 17 чэрвеня Еўрапарламент збіраецца разгледзець заяўку Украіны на кандыдацтва ў ЕЗ. Таксама віцэ-прэм’ер у еўрапейскай і еўраатлантычнай інтэграцыі Вольга Стэфанішына заявіла, што тры краіны ЕЗ выступаюць супраць надання Украіне статусу кандыдата.
Раман Лугоўскі belsat.eu
