Намеснік кіраўніка гарадзенскай турмы загадаў раздзяваць падсудных перад судовым паседжаннем.
Намеснік кіраўніка гарадзенскай турмы загадаў раздзяваць падсудных перад судовым паседжаннем, нават здымаць бялізну. Гэта робіцца нібыта для таго, каб рэнтгенам правяраць адзенне, паведамляе «Наша Ніва».
Больш за месяц у гарадзенскай турме ідзе суд у «справе Аўтуховіча». Галіна Дзербыш перад апошнім пасяджэннем адмовілася раздзявацца і даваць рэчы на правяранне: яна пенсіянерка, хварэе на рак. Тады з яе пачалі сілай сцягваць адзенне і парвалі майку.
Галіна Дзербыш прасіла суддзю спыніць гэтыя прыніжальныя раздзяванні. Суддзя Максім Філатаў адказаў, што гэта не тычыцца справы і трэба звяртацца да кіраўніцтва турмы. Раней ён ніяк не адрэагаваў на скаргі Уладзіміра Гундара на свавольства турэмнікаў, праз што палітвязень абвесціў галадоўку і пагражаў самагубствам.
На адным з пасяджэнняў Галіна заявіла, што падчас следства ёй увесь час пагражалі і прымушалі агаворваць сябе. Яна неаднаразова пісала скаргі ў пракуратуру, але не атрымала ніводнага адказу. Акрамя гэтага, яе змяшчалі ў карцар тэрмінам на 10 содняў, там не давалі неабходных лекаў, таму яна некалькі разоў траціла прытомнасць. Цягам 15 месяцаў жанчыну ўтрымлівалі ў адзіночнай камеры. У Дзербыш анкалагічная хвароба і праблемы з сэрцам.
Больш за 5 месяцаў жанчына атрымлівае лісты толькі ад сваякоў. Праз тое, што яе ўключылі ў спіс тэрарыстаў, пасылкі і бандэролі, якія ёй дасылаюць неабыякавыя людзі, вяртаюць з пазнакай «адмова». Яе абвінавачваюць паводле трох артыкулаў КК: ч. 2 арт. 285 («Удзел у злачыннай арганізацыі»), ч. 3 арт. 289 («Акт тэрарызму»), ч. 1 арт. 357 («Змова з мэтай захопу ўлады»).
Марыя Мурашка belsat.eu
