Канфіскаваныя асобнікі збіраюцца знішчыць.
У траўні раман беларускага пісьменніка Альгерда Бахарэвіча «Сабакі Еўропы» трапіў у спіс «экстрэмісцкіх матэрыялаў». Цяпер канфіскаваныя асобнікі збіраюцца знішчыць.
,,«Даведаўся сёння, што зробяць з канфіскаваным накладам «Сабакаў Еўропы». Кнігі закатаюць у зямлю трактарам. Memento, quia pulvis es. Трактарыст, газу», – напісаў пісьменнік.
«Memento, quia pulvis es» на лацінскай мове азначае «Памятай, што ты прах».
У красавіку 2021 года новы тыраж раману «Сабакі Еўропы», надрукаваны ў літоўскай друкарні, быў канфіскаваны беларускай мытняй для правядзення экспертызы. У выніку кнігу прызналі «экстрэмісцкай». У жніўні 2021 года выдавецтва «Янушкевіч» абвясціла пачатак продажу «Сабакаў Еўропы» і ўдакладніла, што новы тыраж надрукавалі «ў іншай краіне, з якой у нас няма межаў і мытняў».
Раман быў выдадзены ў 2017 годзе, а ў 2018-м заняў 2-е месца ў спісе прэміі Гедройца. У 2019 годзе расейскамоўны аўтарскі пераклад трапіў у шорт-ліст расейскай прэміі «Большая книга».
Алена Рувіна belsat.eu
