Ім будуць адзначаць выбітныя заслугі перад Беларуссю і беларускім народам
Старшыня Рады БНР Івонка Сурвіла абвесціла пра заснаванне ордэна «Пагоня». Ім будуць адзначаць выбітныя заслугі перад Беларуссю і беларускім народам. Першымі ўзнагародзяць «герояў, якія за свабоду Беларусі ахвяравалі самым дарагім, што мелі: уласным жыццём», гаворыцца ў адмысловым звароце Сурвілы.
Рада БНР заснавала медаль ордэна «Пагоня». Пра гэта гаворыцца ў звароце старшыні Рады Івонкі Сурвілы.
,,«Гэтым медалём Рада БНР да складання сваіх паўнамоцтваў будзе адзначаць выбітныя заслугі перад Беларуссю і беларускім народам. Першымі медаль атрымаюць героі, якія за свабоду Беларусі ахвяравалі самым дарагім, што мелі: уласным жыццём. Наш абавязак – шанаваць памяць гэтых герояў і працягнуць іхную барацьбу», – адзначыла Сурвіла.
Ордэнам узнагародзяць актывістаў і пратэстоўцаў, якія загінулі падчас падзеяў мірнай рэвалюцыі, што пачалася ў 2020 годзе: Вітольд Ашурак, Раман Бандарэнка, Мікіта Крыўцоў, Аляксандар Тарайкоўскі, Генадзь Шутаў, Канстанцін Шышмакоў.
Таксама адзначаць беларускіх добраахвотнікаў, якія загінулі на вайне ва Украіне: Дзмітрый Апанасовіч, Аляксей Вешчавайлаў, Павел Волат, Васіль Грудовік, Канстанцін Дзюбайла, Іван Марчук, Васіль Парфянкоў, Дзмітрый Рубашэўскі, Аляксей Скобля, Ілля Хрэнаў, Вадзім Шатроў.
Узнагародзяць і беларусаў, што загінулі падчас Рэвалюцыі годнасці і на вайне ва Украіне з 2014 года: Міхаіл Жызнеўскі, Мікалай Іллін, Алесь Чаркашын, Віталій Ціліжэнка.
Рада БНР удакладніла, што медаль ордэна могуць атрымаць не толькі беларусы, але і замежнікі.
«Медаль уручаецца асобам, якія адзначыліся на ніве змагання за волю і незалежнасць Беларусі; выбітным грамадскім і культурніцкім дзеячам у Беларусі і сярод беларускага замежжа; замежнікам, якія спрычыніліся да даследаванняў і папулярызацыі Беларусі ў свеце, а таксама іншым чынам спрыялі нацыянальным інтарэсам Беларусі», – тлумачыцца ў паведамленні Рады БНР.
Сяргей Крот belsat.eu
