Падставаю ёсць ордар на арышт Пуціна праз Міжнародны крымінальны суд.
Улады Паўднёва-Афрыканскай Рэспублікі распачалі перамовы з расейскімі ўладамі ў справе візіту Уладзіміра Пуціна ў ПАР на саміт BRICS. Падстава гэтаму – ордар на арышт Пуціна праз Міжнародны крымінальны суд, пастановы якога ПАР абавязаная выконваць, піша выданне «The Sunday Times».
Кіраўніцтва ПАР спрабуе дамовіцца з уладамі Расеі, каб Уладзімір Пуцін адмовіўся ад прыезду на саміт BRICS і ўзяў удзел у імпрэзе праз відэасувязь. Прычынаю ёсць пастанова Міжнароднага крымінальнага суда аб арышце Пуціна.
,,«У нас няма варыянту не арыштоўваць Пуціна. Калі ён прыедзе, нам давядзецца яго арыштаваць», – заявіла крыніца выдання «The Sunday Times».
Раней прэзідэнт ПАР Сірыл Рамапхоса заявіў, што краіна можа выйсці з дамоўленасцяў з Міжнародным судом, пазней зʼявілася інфармацыя ў справе таго, што ўрад краіны разглядае розныя варыянты захадаў у выпадку, калі Пуцін усё ж прыедзе на саміт.
Саміт BRICS адбудзецца ў ПАР у жніўні сёлета.
Алена Аляксандрава belsat.eu
