Шукалі нібыта за махлярства. Але Украіна не можа экстрадаваць людзей у Беларусь.
На пункце пропуску «Рава-Руская», што ва Львоўскай вобласці Украіны на мяжы з Польшчаю, 31 кастрычніка затрымалі грамадзяніна Беларусі, на якога Інтэрпол выдаў «чырвоную картку», але суд пастанавіў не экстрадаваць беларуса на радзіму, расказвае радыё «Свабода».
Імя чалавека не называюць, але вядома, што гэта грамадзянін Беларусі родам з Пружанаў, які ехаў з Польшчы ва Украіну з польскім падарожным дакументам. Але праз «чырвоную картку» Інтэрполу (запыт на арышт асобы перад экстрадыцыяй, не роўны міжнароднаму вышуку) на яго склалі адпаведны пратакол, пракуратура Львоўскай вобласці звярнулася ў суд па экстрадыцыйны арышт.
Суд адмовіў, бо пасля пачатку поўнамаштабнай вайны ва Украіне «ў дачыненнях з Беларуссю немагчыма выконваць міжнародныя пагадненні ў пытаннях прававой супрацы ў цывільных і крымінальных справах, у тым ліку з адпаведнымі органамі Рэспублікі Беларусь аб экстрадыцыі асобы», ды і любыя дыпламатычныя кантакты спыненыя. Судовае рашэнне яшчэ могуць абскардзіць у апеляцыйным парадку.
На момант публікацыі ў базе «чырвоных картак» Інтэрполу не было чалавека, які падыходзіў бы пад гэтае апісанне (грамадзянін Беларусі або нарадзінец Пружанаў), таксама адпаведнага чалавека не знайшлося ў ранейшых запісах Інтэрполу, дасяжных ва «Ўэб-архіве». Запытаў ад Беларусі ў той базе наогул няма. Магчыма, запыт быў у нейкіх даўніх версіях базы Інтэрполу.
Паводле радыё «Свабода», Беларусь абвясціла гэтага чалавека ў міжнародны вышук за «махлярства ў асабліва буйным памеры». Пры гэтым улады Беларусі выкарыстоўваюць запыты на міжнародны вышук супраць палітычных апанентаў, а крымінальны артыкул за махлярства часам прыпісваюць палітвязням (напрыклад, Дзмітрыю Стрыжаку, Уладзіславу Савіну, Сцяпану Латыпаву і Уладзіміру Дудараву).
Алесь Наваборскі belsat.eu
