YouTube перастаў адкрывацца перад самым новым годам і быў дасяжны толькі праз VPN.
Прыкладна за 10 хвілінаў да новага года ў Беларусі перастаў адкрывацца YouTube. Пра гэтую праблему паведамлялі з розных гарадоў краіны, піша Zerkalo.io. Якраз у гэты час на YouTube-канале Святланы Ціханоўскай трансляваўся ейны навагодні зварот.
Паводле чытачоў, YouTube перастаў адкрывацца і праз хатні інтэрнэт, і праз мабільных аператараў А1 і МТС – атрымаць доступ можна было толькі праз VPN.
,,«Мая мама ў Беларусі не змагла паглядзець звароту Ціханоўскай. Пара маіх сяброў таксама. Кажуць, што YouTube за 5-10 хвілінаў да звароту ўвогуле перастаў ладавацца», – распавёў чытач Zerkalo.io.
У некаторых на дадатак да таго, што не працаваў YouTube, не было магчымасці зайсці і на іншыя сайты, апроч як праз VPN. Паводле тэлеграм-каналу «МотолькоПомоги», таксама назіраліся збоі ў доступе да розных сэрвісаў Google.
YouTube зноў зрабіўся дасяжным без VPN прыкладна а 00:05 – 00:10 1 студзеня.
Паводле «Еўрарадыё», адзін з найбольш папулярных запытаў беларусаў у навагоднюю ноч – «што з ют’юбам».
Марыя Міхалевіч belsat.eu
