Вайна ва Украіне, падсумоўваем асноўныя падзеі на вечар 7 студзеня.
«Белсат» падводзіць вынікі 683-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 7 студзеня чытайце ў нашым аглядзе.
У Генеральным штабе Збройных сілаў Украіны паведамілі пра адбіццё трох атак праціўніка каля населеных пунктаў Сынькоўка, Петрапаўлаўка і Іванаўка ў Купянскім раёне Харкаўскай вобласці.
У сваю чаргу ў Міністэрстве абароны РФ заявілі пра няўдалыя атакі ўкраінцаў каля Сынькоўкі і Іванаўкі.
Расейскі ваенкор Сямён Пегаў удакладняе, што войскі намагаліся прарваць абарону ЗСУ ў Сынькоўцы пры падтрымцы авіяцыі, але поспеху не дасягнулі.
Аналітыкі праекту Deepstate пішуць, што расейцы агулам засяродзіліся на нанясенні ўдараў па пазіцыях праціўніка на купянскім кірунку, а наземныя аперацыі праводзяцца выключна з мэтай паляпшэння тактычнага становішча.
Зменаў лініі фронту не зафіксавана.
На ліманскім кірунку ідуць сустрэчныя баі на тэрыторыі Серабранскага лясніцтва ў Луганскай вобласці. Пегаў піша пра пераменны поспех праціўнікаў.
Абодва бакі атакуюць і каля сяла Церны на поўначы Данецкай вобласці – фронт стабільны.
На бахмуцкім кірунку войскі цягам апошніх содняў наступалі каля населеных пунктаў Багданаўка, Хромава, Клішчыеўка, Андрэеўка і Арэхава-Васільеўка.
Прарасейскі тэлеграм-канал «Multi_XAM» сцвярджае, УС РФ замацаваліся ў паўночнай частцы Багданаўкі (на захадзе ад Бахмуту). Атакуючы на гэтым участку фронту яны імкнуцца абысці групоўку ЗСУ з паўночнага захаду ад сяла Іванаўскае. Паводле крыніцы, на гэтым фоне асобныя перадавыя атрады ўкраінцаў адцягваюцца да каналу Северскі Данец – Данбас для перагрупавання.
На паўночным фланзе аўдзееўскага кірунку, паводле Генштабу ЗСУ, цягам апошніх содняў сілы абароны краіны адбілі восем атак праціўніка каля населеных пунктаў Новабахмутаўка, Стэпавое і Аўдзееўка, у гэты ж час на паўднёвым фланзе – 16 атак каля Первамайскага і Невельскага.
Аналітыкі Deepstate удакладняюць, што на поўначы расейцы крыху змясцілі акцэнт сваіх атак з ваколіцаў Стэпавога на Аўдзееўскі коксахімічны завод і суседнія лецішчы. На паўднёвым участку асноўны ціск ідзе на Первамайскае, дзе войскі РФ наступаюць адразу ў некалькіх месцах.
Пегаў адзначае, што населены пункт штурмуюць пасля нанясення авіяцыйных удараў. Таксама ваенкор піша, што ў суседнім Невельскім баі маюць сустрэчны характар.
На мар’інскім кірунку Узброеныя сілы РФ цягам содняў наступалі на Новаміхайлаўку, каля Пабеды і з боку Мар’інкі на суседнюю Георгіеўку.
Ва ўкраінскім камандаванні заявілі пра адбіццё дзевяці атак праціўніка каля Мар’інкі і Новаміхайлаўкі.
Між тым аналітыкі Deepstate гавораць, што УС РФ прасунуліся на захадзе ад Мар’інкі.
Байцы 46-й аэрамабільнай брыгады ЗСУ ўдакладняюць, што расейцы перанеслі свой асноўны ўдар з Новаміхайлаўкі на Георгіеўку, паколькі каля першага населенага пункту цягам тыдня не змаглі дасягнуць аніякіх поспехаў.
Ва ўкраінскім камандаванні паведамілі пра адбіццё атакі праціўніка з поўдня ад сяла Навадараўка на мяжы Запарожскай і Данецкай вобласцяў.
Між тым агулам гэты ўчастак фронту характарызуецца рэдкімі наземнымі аперацыямі пры пастаянным абмене ўдарамі артылерыі.
У цэнтральнай частцы Запарожскай вобласці расейцы атакуюць каля сёлаў Работына, Навапрокапаўка і Вэрбовае (з поўдня ад гораду Арэхаў), імкнучыся палепшыць сваё тактычнае становішча. Зменаў па фронце не зафіксавана.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
