Адключэнне выкліканае неабходнасцю ліквідацыі дэфекту трубаправоду.
У Віцебску 10 студзеня ў частцы гораду будуць адключаныя ацяпленне і гарачая вада. Пра гэта паведамілі ў «Віцебскэнерга».
Без ацяплення і гарачай вады з 07:30 да 20:00 застануцца некаторыя жылыя дамы па праспекце Перамогі, вуліцах Чкалава, Воінаў-Інтэрнацыяналістаў, а таксама размешчаныя тамсама чатыры крамы, адміністрацыйны будынак і царква.
Адключэнне выкліканае неабходнасцю ліквідацыі дэфекту трубаправоду.
«Уцечка цепланосбіту была своечасова знойдзена персаналам Віцебскага раёну цеплавых сетак, ажыццёўлена дэфектоўка пашкоджанага ўчастка, а таксама выкананыя падрыхтоўчыя мерапрыемствы для арганізацыі ліквідацыі дэфекту з мэтай мінімізацыі часу адсутнасці цепланосбіта ў спажыўцоў», – заявілі ў ведамстве.
Там адзначылі, што да ліквідацыі дэфекту прыступаюць, калі «ў рэгіёне спалі моцныя маразы».
Таксама ацяпленне і гарачую ваду адключаць у менскім мікрараёне Малінаўка. Без іх застануцца жылыя дамы, дзіцячыя садкі, школы, крамы і адміністрацыйныя будынкі па вуліцах Громава, Ясеніна, Рафіева і Слабадской.
Адключэнне таксама звязанае з неабходнасцю рамонтных работ, піша «Менскэнерга».
У адным з раёнаў Менскай вобласці школа не ацяпляецца ўжо некалькі дзён пасля нядаўняй аварыі на мясцовай кацельні. У выніку дзеці і настаўнікі вымушаныя сядзець на ўроках у куртках, бо тэмпература ў класах складае ад +6 да +8 °С.
Чыноўнікі не дазволілі адмяніць заняткі, каб «не парушаць навучальнага працэсу». Праўда, у школе скарацілі час пераменаў паміж урокамі, каб дзеці пайшлі дадому крыху раней.
Якуб Хруст belsat.eu
