Пра галоўныя падзеі станам на вечар 22 студзеня чытайце ў нашым аглядзе.
«Белсат» падводзіць вынікі 698-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 22 студзеня чытайце ў нашым аглядзе.
У Генеральным штабе Збройных сілаў Украіны паведамілі пра адбіццё сямі атак праціўніка каля сяла Сынькоўка ў Харкаўскай вобласці. Пры гэтым і самыя ЗСУ контратакуюць.
Разам з тым украінскае камандаванне зусім не ўзгадвае іншыя ўчасткі фронту на купянскім кірунку, дзе таксама наступаюць расейскія вайскоўцы.
Тэлеграм-канал «Рыбарь» піша, што Узброеныя сілы РФ развіваюць поспех у ваколіцах раней занятага сяла Крухмальнае на Харкаўшчыне: тут яны замацаваліся на трасе Н-26 і расшырылі зону кантролю на поўначы, падышоўшы да населеных пунктаў Катляроўка і Кіслоўка, адначасова з гэтым яны прасунуліся на захад да Бераставога, дзе цяпер ідуць сустрэчныя баі. Крыніца адзначае, што цяпер ЗСУ контратакуюць у Крухмальным, імкнучыся вярнуць страчаныя пазіцыі.
На суседнім ліманскім кірунку ўкраінскі бок фіксуе пяць безвыніковых атак праціўніка каля сёлаў Церны і Ямпалаўка на поўначы Данецкай вобласці, а таксама 6 – у ваколіцах Белагораўкі на Луганшчыне.
Між тым прарасейскі тэлеграм-канал «Два майора» заяўляе пра поспехі войскаў РФ на паўднёвым усходзе сяла на тэрыторыі мелавога заводу.
Самыя ўкраінцы больш за 10 разоў атакавалі ў ваколіцах Макееўкі, Новаягораўкі і Ямпалаўкі, але лінія сутыкнення засталася нязменнай.
На бахмуцкім кірунку ініцыятыва таксама застаецца за расейскімі вайскоўцамі, якія наступаюць на захадзе і поўдні ад раённага цэнтру, імкнучыся ў выніку выйсці да гораду Часаў Яр.
Украінскі Генштаб фіксуе шэраг няўдалых атак праціўніка каля населеных пунктаў Георгіеўка, Багданаўка, Іванаўскае і Клішчыеўка.
Тэлеграм-канал «Два майора» сцвярджае, што УС РФ усё ж прасунуліся ў Багданаўцы і ў лесапасадках на поўначы ад Клішчыеўкі.
Пры гэтым Міністэрства абароны РФ паведамляе пра актыўнасць ЗСУ каля апошняга сяла: тут за содні яны здзейснілі прынамсі шэсць атак, але поспеху не дасягнулі.
«Рыбарь» піша, што ў Багданаўцы УС РФ дайшлі да цэнтру сяла, пры гэтым паўднёва-заходняя частка (каля траціны па плошчы) застаецца за ўкраінцамі. Каля Іванаўскага Акрамя гэтага крыніца адзначае атакі расейцаў з паўднёвага ўсходу ад Іванаўскага і сустрэчныя баі каля дамбаў у ваколіцах Андрэеўкі.
На аўдзееўскім кірунку, паводле ўкраінскага камандавання, цягам содняў сілы абароны краіны адбілі не менш за 17 атак праціўніка ў ваколіцах населеных пунктаў Новабахмутаўка, Стэпавое, Аўдзееўка, Севернае, Первамайскае і Невельскае.
Расейскі ваенкор Сямён Пегаў удакладняе, што ў Стэпавым баі маюць сустрэчны характар.
Пры гэтым найбольш гарачым участкам на кірунку застаецца паўднёвы ўсход самой Аўдзееўкі, дзе напярэдадні ўдалося замацавацца расейскім вайскоўцам. Пры гэтым ЗСУ контратакуюць, намагаючыся вярнуць страчаныя пазіцыі. Ёсць меркаванні, што далей расейцы паспрабуюць прабіцца да мікрараёну Хімік (на захадзе гораду), каб зрэзаць значны ўчастак абароны ўкраінцаў.
На мар’інскім кірунку асноўныя намаганні расейцаў засяроджаныя ў ваколіцах сёлаў Георгіеўка і Новаміхайлаўка.
Тэлеграм-канал «Два майора» паведамляе пра расшырэнне расейцамі зоны кантролю каля цэркваў на ўсходзе Георгіеўкі.
На поўдні Украіны найбольш гарачым участкам застаецца выступ па лініі фронту з поўдня ад гораду Арэхаў у Запарожскай вобласці.
Генштаб ЗСУ піша пра сем адбітых атак праціўніка за содні каля населеных пунктаў Вэрбовае і Работына.
У гэты ж час прарасейскія крыніцы паведамляюць пра контратакі ЗСУ каля Вэрбовага, у выніку якіх яны адбілі адну з лесапасадак.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
