Маўляў, загінулі 74 асобы. Паводле ўкраінскай версіі, там былі ракеты С-300.
У Белгародскай вобласці 24 студзеня пацярпеў катастрофу вайсковы самалёт, паведамляе губернатар вобласці Вячаслаў Гладкоў. Міністэрства абароны Расеі заяўляе, што загінулі 74 асобы, у тым ліку 65 украінскіх ваеннапалонных. Ва Украіне кажуць пра іншую версію.
Расейскія праўладныя СМІ сцвярджаюць, што ваеннапалонных дастаўлялі ў Белгародскую вобласць для абмену. Паводле гэтай версіі, суправаджалі іх усяго тры асобы, бо экіпаж Іл-76 складаецца з шасці чалавек.
«Українська правда» паведамляла, што да катастрофы самалёта датычная СБУ, але потым удакладніла, што інфармацыя не пацвердзілася. Крыніцы выдання ў Генштабе Украіны заяўляюць, што на борце былі ракеты для комплексаў С-300, з якіх расейскія войскі абстрэльваюць Харкаўскую вобласць.
«У Мінабароны Украіны пакуль не могуць пацвердзіць, што самалёт паразілі ўкраінскія сілы абароны, бо “яшчэ высвятляюць інфармацыю”», – паведамляе «Суспільне».
А Міністэрства абароны Расеі вінаватых ужо вызначыла. У ведамстве заявілі, што самалёт быў збіты дзвюма ракетамі ЗРК, запушчанымі з ваколіцаў паселішча Лыпці Харкаўскай вобласці. Гэта нібыта зафіксавана «радыёлакацыйнымі сродкамі Паветрана-касмічных сілаў Расеі».
Кіраўнік абароннага камітэту Дзяржаўнай думы Андрэй Картаполаў раней сцвярджаў, што ўкраінцы збілі Іл-76 трыма ракетамі:
,,«Кіраўніцтва Украіны выдатна ведала пра абмен, што рыхтуецца, было праінфармаванае пра тое, якім чынам палонныя будуць дастаўляцца, аднак самалёт Іл-76 быў збіты трыма ракетамі зенітна-ракетнага комплексу або «Patriot», або «IRIS T» нямецкай вытворчасці, адмыслоўцы разбяруцца».
Пры гэтым крыніца агенцтва «Інтерфакс-Україна» сцвярджае, што самалёт разбіўся на ўзлёце, і гэта супярэчыць інфармацыі расейскага боку пра тое, што ваеннапалонных везлі на абмен, то бок Іл-76 мусіў ляцець у Белгарад, а не з Белгараду.
Паводле расейскага праўладнага каналу «SHOT», абмен 192 на 192 асобы меў адбыцца на мяжы ў Белгародскай вобласці.
Арсен Рудэнка, Сцяпан Кубік belsat.eu
