Траўмы цяжкія, некаторых пацярпелых пераводзяць у Менск.
Раніцай 7 лютага на 130-м кіламетры аўтадарогі М-4 «Менск – Магілёў» паблізу вёскі Васілеўшчына кіроўца маршрутнага таксі не справіўся з кіраваннем і ўрэзаўся ў агароджу.
Як паведамляюць у міліцыі, пры ажыццяўленні манеўру перастраення з правай паласы руху ў левую аўтамабіль занесла. У выніку адбыўся наезд на дарожную агароджу.
У маршрутцы ў той момант знаходзіліся 10 пасажыраў.
Міністэрства аховы здароўя паведамляе, што 8 пацярпелых былі шпіталізаваныя. У людзей дыягнаставаныя спалучаныя траўмы: чэрапна-мазгавыя траўмы, пераломы, удары, пашкоджанні мяккіх тканак твару.
Двое пасажыраў былі спачатку дастаўленыя ў Бярэзінскую лякарню, але ў сувязі з цяжкасцю траўмаў і неабходнасцю медычнай дапамогі больш высокага ўзроўню іх перавялі ў Менск. Яшчэ адну жанчыну завезлі ў лякарню ў Барысаве.
Адна з пацярпелых цяпер у рэанімацыі Бялыніцкай лякарні. Каб выратаваць жанчыну, на кансіліум прыбылі спецыялісты абласнога ўзроўню: хірург, нейрахірург, траўматолаг, сасудзісты хірург. Цяпер ідзе аперацыя.
Яшчэ двое пацярпелых дастаўленыя ў Магілёў у шпіталь хуткай медычнай дапамогі.
Пазней Следчы камітэт распавёў падрабязнасці ДТЗ. Паводле СК, гума на пярэдняй восі мікрааўтобуса была не прыдатная для эксплуатацыі з прычыны зносу, а кіроўца падчас руху адцягваўся на мабільны тэлефон.
,,«Пасажыры рабілі яму заўвагі і нават знялі гэта на камеру мабільнага тэлефона за некалькі секунд да аварыі», – кажуць праваахоўнікі.
Была распачатая крымінальная справа паводле ч.2 арт.317 («Парушэнне правілаў дарожнага руху, якое пацягнула па неасцярожнасці прычыненне цяжкага цялеснага пашкоджання»). Максімальнае пакаранне – да пяці гадоў зняволення.
Паводле СК, 31-гадовы кіроўца маршруткі неаднаразова прыцягваўся да адказнасці за парушэнні, звязаныя з перавозкай пасажыраў, а ў кастрычніку 2023 году быў вінаватым у ДТЗ.
Глеб Нержын belsat.eu
