Выбары прайшлі з высокай яўкай і без парушэнняў, сцвярджае ЦВК краіны.
«Народ абраў свайго лідара», – гэтак падчас прэс-канферэнцыі выказаўся старшыня ЦВК Азербайджану Мэзахір Пэнахаў. Паводле яго, чакаюцца вынікі з яшчэ крыху больш як 6 % выбарчых участкаў, але яны ўжо не зменяць сітуацыі, што склалася на гэты момант.
Згодна з апошнімі звесткамі ЦВК краіны, Ільхам Аліеў набраў больш за 92,05 % галасоў. Канчатковая яўка склала 76,73 %, а ў саміх выбарах узялі ўдзел 4 971 032 з 6 478 840 зарэгістраваных выбарнікаў. Гэта крыху больш, чым у 2018 годзе (тады яўка была роўнай 74,5 %).
Як адзначылі ў азербайджанскім ЦВК, парушэнняў падчас правядзення выбараў не было.
Шасцёра супернікаў дзейнага прэзідэнта набралі мінімальную колькасць галасоў, толькі дэпутату парламенту Західу Аруджу ўдалося набраць больш за 2 %, астатнія не дасягнулі і гэтага паказніку.
Асаблівасцю гэтых выбараў было тое, што яны ўпершыню праходзілі і на тэрыторыі Нагорнага Карабаху, кантроль над якім узяў летась Азербайджан. Тут было створана 26 участкаў для галасавання, а ў спісах выбарчых камісіяў было зарэгістравана 23 тысячы чалавек.
Пазачарговыя выбары Ільхам Аліеў прызначыў летась, і гэта пры тым, што сямігадовы тэрмін ягонага кіравання мусіў бы завершыцца толькі ў красавіку 2025 года. Прычына такога пераносу не была патлумачаная.
Ільхам Аліеў – прэзідэнт краіны з 2003 года, ён заняў пасаду пасля смерці свайго бацькі – Гэйдара Аліева.
Раман Шавель belsat.eu
