Камандуючым Абʼяднаных сілаў ЗСУ прызначаны Юрый Содаль.
Прэзідэнт Украіны Уладзімір Зяленскі прызначыў камандуючым Абʼяднанымі сіламі ЗСУ генерала Юрыя Содаля.
Камандаванне Абʼяднаных сілаў ЗСУ адказвае ў тым ліку за беларускі кірунак.
Генерал-лейтэнант Сяргей Наеў, які раней займаў гэтую пасаду, быў адпраўлены ў адстаўку.
Наеў займаўся ўмацаваннем абарончых рубяжоў і пазіцыяў на мяжы з Беларуссю, неаднаразова выказваўся наконт імавернасці новага нападу з беларускай тэрыторыі.
53-гадовы генерал-лейтэнант Юрый Содаль раней камандаваў Марской пяхотай. У 2022 годзе атрымаў званне Героя Украіны.
Адстаўка Наева адбылася ў рамках маштабных кадравых перастановак у кіраўніцтве ЗСУ. 8 лютага Зяленскі адправіў у адстаўку галоўнакамандуючага ЗСУ Валерыя Залужнага і прызначыў на ягонае месца Аляксандра Сырскага, які раней узначальваў Сухапутныя войскі. Замест Сырскага Сухапутныя войскі ЗСУ ўзначаліў Аляксандр Паўлюк.
Глеб Нержын belsat.eu
