Хлопец з’ехаў у Дубай, але мае нясплачаныя штрафы і пазыкі ў Расеі.
Блогера Улада Бумагу, які паходзіць з Беларусі, шукаюць расейскія судовыя прыставы з-за штрафаў і нясплачаных даўгоў падатковай службе, піша тэлеграм-канал SHOT.
Агулам, згодна са звесткамі тэлеграм-каналу, ва Улада Бумагі ёсць чатыры неаплачаныя штрафы на 3500 расейскіх рублёў за перавышэнне хуткасці і неаплачаную паркоўку. Таксама за ім застаецца двухмесячны доўг на 278 тысячаў рублёў перад Федэральнай падатковай службай Расеі.
Вядома, што ад свайго кантэнту ў сацыяльных сетках Улад Бумага мае прыбытак каля 1 мільёна долараў штомесяц. Гадавое абарачэнне ягоных кампаніяў за мінулы год перавысіла 455 мільёнаў рублёў.
Блогер ужо некалькі месяцаў запар падарожнічае па свеце. Апошнім прыпынкам у ягоных вандроўках быў Дубай. Ён жыве разам з блогеркай Юліяй Гадуновай, пара чакае нараджэння дзіцяці.
Раман Шавель belsat.eu
