Ерэван і Баку абвінавацілі адно аднаго ў правакацыі на мяжы.
Арменія і Азербайджан абвінавацілі адно аднаго ў правакацыі на мяжы. У выніку страляніны, паводле паведамленняў з Ерэвану, загінулі дзве асобы. У Баку кажуць пра аднаго параненага памежніка.
Дзяржаўнае агенцтва AZERTAC перадае, што «ў выніку чарговай правакацыі ўзброеных сілаў Арменіі быў паранены вайсковец Дзяржаўнай памежнай службы Азербайджану».
,,«Гэтая правакацыя – сур’ёзны ўдарам па мірным працэсе і супярэчыць мірным пасланням, што дэкларуе Арменія», – заявілі ў азербайджанскім МЗС.
У абаронным ведамстве Арменіі, паводле news.am, назвалі хлуслівымі абвінавачванні Баку:
,,«Паведамленне пра тое, што фармаванні ўзброеных сілаў Арменіі нібыта адкрылі агонь па азербайджанскіх пазіцыях у паўночна-ўсходняй частцы памежнай зоны, не адпавядае рэчаіснасці».
У Ерэване кажуць, што ў выніку атакі з боку суседняй краіны «ёсць двое забітых і параненыя».
Гэта першы інцыдэнт паміж дзвюма дзяржавамі пасля абвастрэння ў верасні летась, калі Азербайджан зладзіў «антытэрарыстычныя захады» ў Нагорным Карабаху. У выніку тых падзеяў непрызнаная рэспубліка перастала існаваць, а амаль усё насельніцтва рэгіёну эвакуявалася ў Арменію.
Сцяпан Кубік belsat.eu
