Хроніка рэпрэсій за 13 лютага.
«Белсат» працягвае сачыць за рэпрэсіямі ў нашай краіне, якія чыніць рэжым Аляксандра Лукашэнкі.
Суд Баранавіцкага раёна і Баранавіч вынес прысуд Яўгену Кладову паводле ч. 1 арт. 368 Крымінальнага кодэксу (абраза Лукашэнкі). Мужчыну арыштавалі 30 жніўня 2023 года за тое, што на ягонай старонцы ў «Аднакласніках» былі даступныя выявы, «якія супярэчаць агульначалавечай маралі і нормам паводзін, прынятым у грамадстве, тым самым публічна наўмысна прынізіў гонар і годнасць асобы Лукашэнкі ў сувязі з ажыццяўленнем ім сваіх паўнамоцтваў, выказанае ў непрыстойнай форме». На судзе Яўген Кладоў віны не прызнаў, бо не ведаў, што выявы застануцца на сцяне ягонага акаўнту пасля таго, як ён паставіць ім адзнаку «Клас». Тым не менш мужчыну пакаралі годам калоніі ва ўмовах агульнага рэжыму.
Сёння стала вядома аб затрыманні жыхара Віцебска, які ў «Аднакласніках» паставіў «лайк» пад пастом пра смерць начальніка Аршанскага РУУС.
Стала вядома аб затрыманы былога актывіста БСДП (Грамада) Анатоля Прышчыка. 74-гадовага мужчыну, паводле ягоных сваякоў, затрымалі 12 лютага «15 амбалаў са зброяй». Затрыманне адбылося ў рамках адміністрацыйнай справы паводле ч. 2 арт. 19.11 КаАП («Выраб, распаўсюд ці захаванне экстрэмісцкіх матэрыялаў»). Вядома, што Анатоль Прышчык неаднаразова з’яўляўся назіральнікам падчас выбараў.
13 лютага на канале сілавікоў з ГУБАЗіКу з’явілася інфармацыя аб затрыманні траіх працаўнікоў кампаніі «Газпрам трансгаз Беларусь». Сярод затрыманых – інжынер і вядучы інжынер. Іх абвінавачваюць у падтрыманні пратэсных настрояў, захоўванні «пратэснай» сімволікі, рэпостах з «экстрэмісцкіх» тэлеграм-каналаў і ўдзеле ў акцыях пратэсту ў 2020 годзе. Сілавікі сцвярджаюць, што затрыманне адбылося пасля даносу, які напісалі калегі.
Сілавікі затрымалі супрацоўніка ІТ-кампаніі з Горадні. Мужчыну ставяць у віну ўдзел у акцыях пратэсту і напісанне абразлівых каментароў. Таксама сілавікі сцвярджаюць, што ў офісе, дзе працаваў мужчына, вісеў бела-чырвона-белы сцяг і налепкі з «Пагоняй», усім іншым супрацоўнікам гэтай кампаніі пагражаюць «зачысткай».
Чарговы хапун у Баранавічах. На гэты раз затрыманыя – двое мужчын і адна дзяўчына. Іх абвінавачваюць у акцыях пратэсту 9 жніўня 2020 года.
Беларускія праваабаронцы выступілі з сумеснай заявай, у якой патрабуюць дапусціць да жыхара Наваполацка Сяргея Ерамеева незалежнага адваката, каб пераканацца, што ён жывы. Ад мужчыны, якога абвінавачваюць у падрывах на чыгунцы ў Расеі ўвосень 2023 года, няма звестак ужо больш за 2 месяцы.
Суд Фрунзенскага раёна Менска асудзіў Сафію Кажамякіну паводле ч. 1 арт. 342 КК («Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх») за ўдзел у двух маршах 2020 года. Дзяўчыне прысудзілі 2,5 гады «хатняй хіміі».
Блогер Сяргей Пятрухін быў эвакуяваны з Беларусі. Гэта адбылося больш чым праз год пасля таго, як ён выйшаў на волю, адбыўшы пакаранне. Пятрухіна затрымалі ў чэрвені 2020 года разам з Аляксандрам Кабанавым і асудзілі паводле трох артыкулаў Крымінальнага кодэксу РБ. Суд прыгаварыў яго да 3 гадоў пазбаўлення волі. 17 снежня 2022 года Пятрухін выйшаў з турмы, але яшчэ больш за год знаходзіўся ў Беларусі. Эвакуацыяй блогера займаўся фонд «BySol».
Раман Шавель belsat.eu
