«Лукашэнка працягвае гуляць на баку тэрарыстычнай Расеі».
Спікер Дзяржаўнай памежнай службы Украіны Андрэй Дэмчанка ўважае за праяву абсурду заяву Аляксандра Лукашэнкі пра «контртэрарыстычную аперацыю» на мяжы з Украінаю.
,,«Лукашэнка працягвае гуляць на баку тэрарыстычнай Расеі. Сённяшнія ягоныя словы – чарговае пацвярджэнне гэтаму. У нас яны, вядома, могуць выклікаць усмешку, але для сваёй унутранай аўдыторыі яму трэба рабіць такія заклікі, каб хоць і беспадстаўна, але зазначаць, што з Украіны ідзе пагроза», – заявіў Дэмчанка ў інтэрвʼю выданню «Українська правда».
Ён звярнуў увагу на словы Лукашэнкі пра тое, што гэтую «контртэрарыстычную аперацыю» нават у Беларусі ніхто не заўважыў, бо гэта «не вашая справа».
«Лукашэнкаўскі абсурд не спыняецца. Я дагэтуль успамінаю пра ягоныя «тоны зброі», якую яны «затрымлівалі з Украіны», а яшчэ лепш памятаю, адкуль адбылося ўварванне Расеі», – дадаў прадстаўнік Дзяржаўнай памежнай службы.
Нагадаем, Лукашэнка 16 лютага заявіў, што ў Лельчыцкім раёне была праведзеная «чэкісцкая ваенная аперацыя» і нібыта затрыманыя «дыверсанты». «Толькі сёння затрымалі некалькі дыверсантаў на ўкраінскай мяжы. З дапамогаю дронаў балотамі некаторыя з украінскіх грамадзянаў перапаўзалі на нашую мяжу, перакідвалі выбухоўку для ўчынення дыверсіяў перадусім на тэрыторыі Расеі і Беларусі», – распавёў ён.
Глеб Нержын belsat.eu
