Менск чыніць палітычны пераслед з дапамогаю Інтэрполу.
Рэжысёра Андрэя Гнёта затрымалі ў Сербіі на запыт Інтэрполу яшчэ ў кастрычніку летась, і суд першай інстанцыі пастанавіў экстрадаваць яго ў Беларусь. 19 лютага скаргу на гэтую пастанову разгледзеў апеляцыйны суд, рашэнне яшчэ не вядомае. Дарадца Святланы Ціханоўскай у прававых пытаннях Крысціна Рыхтэр сказала «Белсату», што цяперашнія ўлады ў Менску пераследуюць рэжысёра з палітычных прычынаў.
Запыт у Інтэрпол на затрыманне Андрэя Гнёта напісаў пракурор Савецкага раёну Менску Антон Загароўскі – ён ужо 13 гадоў пад санкцыямі ЕЗ. У чорны спіс службоўца залучылі за ўдзел у рэпрэсіях пасля прэзідэнцкіх выбараў у Беларусі ў 2010 годзе, адзначыла ў размове з «Белсатам» дарадца Святланы Ціханоўскай у прававых пытаннях Крысціна Рыхтэр. Яна адзначыла, што Офіс абранай прэзідэнткі ведае пра справу рэжысёра амаль з самага моманту яго затрымання ў Сербіі:
,,«Мы ніяк не можам паўплываць на суд, але можна накіраваць характарыстыкі, хадайніцтвы, лісты падтрымання. Офіс Святланы Ціханоўскай гэта зрабіў. Таксама «BELPOL» разглядзеў гэтую справу і зрабіў выснову, што гэта сапраўды палітычна матываваны кейс. Праз адвакатаў гэта было перададзенае ў суд».
Суд першай інстанцыі пастанавіў экстрадаваць Гнёта, сёння апеляцыйны суд разгледзеў скаргу на гэтае рашэнне. Вынікі будуць агучаныя бліжэйшымі днямі.
«З нашага боку мы зладзілі акцыю дыпламатычнай увагі да гэтага і звярнуліся да ўсіх амбасадараў краінаў ЕЗ у Бялградзе. Стварылася нефармальная група з васьмі амбасадараў, якія назіралі за гэтым кейсам. Яны сустракаліся з адвакатамі, разбіраліся, што ўвогуле адбываецца, вялі перамовы з дзяржаўнымі органамі, напрыклад, міністэрствам юстыцыі Сербіі наконт таго, што гэта палітычная справа, што экстрадыцыі быць не мусіць», – паведаміла Рыхтэр.
Цяперашнія ўлады ў Менску абвінавачваюць Андрэя Гнёта ў нейкім эканамічным злачынстве, але насамрэч проста выкарыстоўваюць Інтэрпол у рэпрэсіўных мэтах. Адвакат беларуса пісаў запыт у арганізацыю пра выняцце ягонага файла з увагі на палітычны пераслед.
«Натуральна, раней мы рабілі звароты ў Інтэрпол, каб давесці пра сітуацыю ў Беларусі. Гэта вельмі закрытая структура, з ёй вельмі складана зарганізаваць нейкія сустрэчы. Мы спрабуем праз нацыянальныя бюро Інтэрполу ў розных краінах камунікаваць, каб даносіць інфармацыю пра Беларусь», – падкрэсліла суразмоўца «Белсату».
Яна канстатавала, што ігнараванне ўсіх запытаў на вышук ад Беларусі будзе мець наступствы: у Менску таксама перастануць затрымліваць падазраваных з базы Інтэрполу. Нашая краіна можа зрабіцца «крымінальнай гаванню», папярэдзіла Рыхтэр.
Андрэй Гнёт – беларускі журналіст і рэжысёр, палітычны актывіст. Акрамя таго, паводле неафіцыйных звестак выдання «DW Беларусь», ён сузаснавальнік «Свабоднага аб’яднання спартоўцаў SOS-BY», прызнанага «экстрэмісцкім фармаваннем» у 2022 годзе.
Сцяпан Кубік belsat.eu
