Прайшоў суд аб замене неадбытай часткі пакарання.
Аднаго з галоўных фігурантаў «справы “Белгазпрамбанку”» Дзмітрыя Кузьміча, верагодна, вызвалілі з калоніі, паведамляюць праваабаронцы. У Віцебскім раённым судзе 9 лютага разглядалі ў дачыненні да яго справу «Аб замене неадбытай часткі пакарання ў выглядзе пазбаўлення волі».
Дзмітрый Кузьміч – былы намеснік старшыні праўлення банку «Белгазпрамбанк». Яго судзілі ў межах адной справы з Віктарам Бабарыкам. Кузьміча пакаралі 6,5 гадамі калоніі.
,,«На працэсе ён прызнаў віну, даў падрабязныя паказанні падчас следства і суда. Хутчэй за ўсё, паводле вынікаў новага суда яго вызвалілі з калоніі», – піша «Вясна».
Справу аб замене пакарання разглядала Наталля Траццякова.
У той жа час амаль год нічога не вядома пра Віктара Бабарыку, які знаходзіцца ў наваполацкай калоніі № 1.
«Абрывачная інфармацыя час ад часу з’яўляецца ад былых вязняў ПК-1. Да гэтага часу няма афіцыйнага тлумачэння, чаму ў ноч з 24 на 25 красавіка 2023 года Віктара даставілі ў гарадскі шпіталь Наваполацку. Пасля гэтага палітвязня так і не паказалі грамадскасці», – працягвае «Вясна».
Віктара Бабарыку пакаралі 14 гадамі пазбаўлення волі нібыта за легалізацыю сродкаў, атрыманых злачынным шляхам, і атрыманне хабару. Прэтэндэнта ў кандыдаты на пасаду прэзідэнта затрымалі 18 чэрвеня 2020 года.
Арсен Рудэнка belsat.eu
