Сілавікі затрымалі яго 23 верасня 2023 года.
Судовы працэс у дачыненні да відэааператара-фрылансера Андрэя Толчына распачнецца 5 сакавіка а 10:00 у Гомельскім абласным судзе. Гэта вынікае з абвесткі на сайце суда.
Журналіста вінавацяць паводле трох артыкулаў Крымінальнага кодэксу: садзейнічанне «экстрэмісцкай дзейнасці», «паклёп» на Аляксандра Лукашэнку і «дыскрэдытацыя» Беларусі.
Весці справу прызначаны суддзя Дзмітрый Казлоў, які ўжо раней судзіў жыхароў Гомельшчыны ў палітычных справах.
Андрэя Толчына сілавікі затрымалі 23 верасня 2023 года.
Пасля выбараў 2010 года Толчын у якасці відэааператара-фрылансера супрацоўнічаў з незалежнымі медыямі. За гэта яго шмат разоў штрафавалі і адпраўлялі на содні за краты на падставе адміністратыўных пратаколаў.
У 2020 годзе Толчына затрымлівалі разам з журналісткай Ларысай Шчыраковай за асвятленне пратэстаў, афіцыйна – нібыта за ўдзел у масавых беспарадках. Таксама журналіста затрымлівалі ў 2021 годзе каля гомельскага СІЗА № 3, дзе ён здымаў сваякоў палітвязняў Міколы Статкевіча і Ігара Лосіка, якіх разам з іншымі абвінавачанымі 24 чэрвеня пачалі судзіць у памяшканні ізалятару.
Якуб Хруст belsat.eu
