«З увагі на меркаванне канфідэнцыйнасці мы не можам раскрываць падрабязную інфармацыю».
Аўстрыйская кампанія «RBI Group» у адказ на запыт «Белсату» растлумачыла, чаму пастанавіла прадаць сваю долю ў беларускім «Прыёрбанку», і адмовілася раскрываць асобу новага ўласніка, спаслаўшыся на патрабаванні канфідэнцыйнасці.
Паведамленне пра тое, што перамовы аб продажы 87,74% акцыяў у «Прыёрбанку» знаходзяцца на прасунутай стадыі, з’явілася 14 лютага. Аўстрыйская кампанія «Raiffeisen Bank International AG» пастанавіла пазбавіцца ад беларускага банку, нягледзячы на страты ў €225 млн.
Называўся таксама пакупнік – фірма з Аб’яднаных Арабскіх Эміратаў «Soven 1 Holding Limited». Аднак звестак пра яе – вобмаль. Ці займаўся гэты інвестар некалі банкаўскім бізнесам, невядома.
«RBI Group» адмаўляецца раскрываць асобу пакупніка.
,,«Мы, натуральна, спраўдзілі, хто з’яўляецца канчатковым бенефіцыярным уласнікам холдынгу, аднак з увагі на меркаванне канфідэнцыйнасці мы не можам раскрываць больш падрабязную інфармацыю», – заявілі ў аўстрыйскай кампаніі ў адказ на запыт «Белсату».
Прычыны продажу «Прыёрбанку» растлумачылі коратка: «Геапалітычная сітуацыя».
«Пастанова аб продажы нашай долі ў «Прыёрбанку» была прынятая з улікам геапалітычнай сітуацыі, і, на нашую думку, угода адпавядае інтарэсам «RBI Group» і яе акцыянераў», – заявілі ў кампаніі.
Там таксама паведамілі, што не кінуць «Прыёрбанк» адразу і канчаткова:
,,«Пасля ўгоды настане пераходны перыяд, цягам якога «Прыёрбанку» будуць надавацца пэўныя аперацыйныя паслугі (галоўным чынам у галіне інфармацыйных тэхналогіяў), каб палегчыць поўны падзел».
Раней палітычны аглядальнік Аляксандр Фрыдман звярнуў увагу, што «Raiffeisen Bank International AG» вельмі гучна абвясціў пра сыход з Беларусі:
«Інфармацыя аб будучай угодзе з’явілася ў галоўных аўстрыйскіх медыях і нават у «Financial Times». У Вене адзначаюць, што продаж даччынага банку ў Беларусі абернецца фінансавымі стратамі, аднак RBI ідзе на гэтыя страты».
Фрыдман мяркуе, што гэтая інфармацыйная кампанія мусіць адцягнуць увагу ад таго, што аўстрыйцы застаюцца ў Расеі, дзе працягвае працу «Райффайзен Банк».
Сцяпан Кубік belsat.eu
