Дзярждэпартамент зноў заклікаў вызваліць палітвязняў і спыніць рэпрэсіі.
Дзярждэпартамент ЗША апублікаваў адмысловую заяву ў сувязі з так званым «адзіным днём галасавання» ў Беларусі.
«Злучаныя Штаты асуджаюць фіктыўныя парламенцкія і мясцовыя выбары рэжыму Лукашэнкі, якія завяршыліся сёння ў Беларусі. Выбары адбываліся ў атмасферы страху, у якой любы выбарчы працэс нельга назваць дэмакратычным. Рэжым працягвае ўтрымліваць больш за 1400 палітычных вязняў. Усе незалежныя палітычныя фігуры альбо ў зняволенні, альбо ў выгнанні», – падкрэслілі ў Дзярждэпартаменце.
ЗША таксама нагадваюць, што грамадзяне Беларусі не мелі права прагаласаваць за мяжою, а прадстаўнікоў АБСЕ да назірання не дапусцілі, што зрабіла выбары яшчэ больш непразрыстымі.
Усе гэтыя злоўжыванні ўладаў прывялі да таго, што рэальнае палітычнае жыццё ўнутры Беларусі было фактычна замарожанае, падкрэсліваюць у Дзярждэпартаменце.
«Злучаныя Штаты прызнаюць сілу, стойкасць і мужнасць грамадзянскай супольнасці і дэмакратычнага руху Беларусі, якія патрабуюць голасу пры вызначэнні будучыні сваёй краіны.
,,ЗША зноў заклікаюць рэжым Лукашэнкі спыніць рэпрэсіі, вызваліць усіх палітвязняў і пачаць дыялог з палітычнымі апанентамі. Беларускі народ заслугоўвае лепшага», – гаворыцца ў заяве.
Нагадаем, 25 лютага 2024 года ўпершыню ў Беларусі адбыўся адзіны дзень галасавання. Электаральная кампанія праходзіла на фоне маштабных рэпрэсіяў і зачысткі палітычнага поля ад апазіцыі. У якасці кандыдатаў у дэпутаты зарэгістраваныя толькі прыхільнікі Аляксандра Лукашэнкі.
Глеб Нержын belsat.eu
