Намеснік міністра распавёў, у чым бачыць патэнцыйную пагрозу для рэжыму Лукашэнкі.
Намеснік міністра ўнутраных справаў Генадзь Казакевіч у інтэрв’ю СТБ распавёў пра барацьбу з праціўнікамі рэжыму Аляксандра Лукашэнкі і пагрозу выкарыстання новых тэхналогіяў.
Паводле Генадзя Казакевіча, аналіз аператыўнай абстаноўкі цяпер паказвае, што «нашы беглыя» не разлічваюць на масавыя акцыі пратэсту. Пры гэтым, як заявіў намеснік міністра, адзначаецца «крайняя радыкалізацыя» імкненняў праціўнікаў рэжыму, і гэта нібыта праяўляецца ў «асобных эпізодах экстрэмісцкіх і, самае галоўнае, тэрарыстычных праяваў».
«Выкарыстоўваецца тактыка тэрарыстычных ячэек, спячая агентура так званая, якая прыводзіцца ў дзеянне пры неабходнасці выканання якога-небудзь тэракту. Аналіз паказвае, што цяпер краінай прызначэння для ўчынення тэрарыстычных актаў з’яўляецца пераважна Расейская Федэрацыя.
,,Пры гэтым тэрыторыя рэспублікі выкарыстоўваецца як з пункту гледжання набыцця агентуры, так і з пункту гледжання перавалачнай базы для накіравання ў Расейскую Федэрацыю, дапусцім, самаробных выбуховых прылад, выбуховых рэчываў і г.д.» – заявіў ён.
Казакевіч сцвярджае, што летась толькі ГУБАЗіК і МУС нібыта «спынылі чатыры такіх тэракту».
МУС таксама бачыць пагрозу рэжыму Аляксандра Лукашэнкі ў развіцці новых тэхналогіяў.
,,«Мае калегі з ГУБАЗ кажуць, што наступная рэвалюцыя будзе рэвалюцыяй TikTok, – заявіў намеснік міістра, – І яна зусім не такая бяскрыўдная. Канкрэтна, напрыклад, год таму ў Расейскай Федэрацыі па пстрычцы ў TikTok 40 тысяч маладых людзей выйшлі на вуліцы, і яны біліся з АМАПам. Хлопчыкі і дзяўчынкі, якім 14 гадоў і вышэй. Іншымі словамі, тэхналогіі ў дзеянні».
Паводле Казакевіча, штучны інтэлект і нейрасеткі могуць выкарыстоўваць для махлярства, а могуць – «для дэструктыву, для здзяйснення рэвалюцыі».
Глеб Нержын belsat.eu
