Забарону прапаноўваецца ўвесці з 15 красавіка 2024 года да 1 ліпеня 2025 года.
Літоўскія ўлады могуць увесці часовую забарону на ўвоз і транзіт «сельскагаспадарчай прадукцыі і кармоў» расейскай і беларускай вытворчасці, паведамляе партал «Delfi».
Разгляд адпаведнай папраўкі ў закон «Аб сельскай гаспадарцы, харчаванні і развіцці вёскі» зарэгістраваў кіраўнік камітэту Сейму ў справе эканомікі Казіс Старкявічус.
Удакладняецца, што забарону прапаноўваецца ўвесці з 15 красавіка 2024 года да 1 ліпеня 2025 года.
4 лютага прэм’ер-міністр Польшчы Дональд Туск падчас прэс-канферэнцыі ў Вільні заявіў аб намеры ініцыяваць увядзенне «поўных санкцыяў» на ўвоз у Еўразвяз сельскагаспадарчых і харчовых тавараў з Беларусі і Расеі.
Пра гэта Туск паведаміў па выніках перамоваў з прэзідэнтам і прэмʼер-міністаркай Літвы Гітанасам Наўседам і Інгрыдай Шыманіце.
Паводле польскага прэмʼера, «агульнаеўрапейскае рашэнне [аб увядзенні такіх санкцыяў. – Заўв. belsat.eu] будзе непараўнальна больш эфектыўнае, чым асобныя рашэнні краінаў рэгіёну».
«Гаворка ідзе аб тым, каб зрабіць санкцыі больш рэалістычнымі і ўзмацніць іх у сувязі з нападам Расеі на Украіну і супрацаю Беларусі з РФ», – сказаў Туск.
Ася Саковіч belsat.eu
