Яны пашкодзілі два аўтамабілі.
У Менску будуць судзіць двух 14-гадовых падлеткаў, якіх абвінавачваюць у злосным хуліганстве. Пра гэта паведамляе «Минск-Новости» са спасылкай на пракуратуру Фрунзенскага раёну.
Паводле версіі пракуратуры, адзін з падлеткаў прыйшоў да другога ў госці і, засумаваўшы, прапанаваў скідваць ваду ў пакетах з 17-га паверху. Школьнікі скінулі два напоўненыя фасовачныя пакеты. Адзін з іх трапіў у лабавую шыбу прыпаркаванага аўтамабіля.
Праз некалькі дзён падлеткі надумалі зноў скінуць пакеты з акна. Спачатку напаўнялі іх вадой, а потым супам і фекаліямі. Адзін з пакетаў пашкодзіў дах аўтамабіля.
Агульная шкода склала амаль 4700 рублёў. На школьнікаў завялі крымінальную справу.
«Абвінавачаныя – навучэнцы 8-га класу адной са сталічных школаў, раней да крымінальнай адказнасці не прыцягваліся, – кажа намеснік начальніка пракуратуры Фрунзенскага раёну Андрэй Сярбун. – Ім выстаўленае абвінавачванне ў здзяйсненні наўмысных дзеянняў, якія груба парушаюць грамадскі парадак і выказваюць відавочную непавагу да грамадства, суправаджаюцца пашкоджаннем чужой маёмасці, адрозніваюцца паводле свайго зместу выключным цынізмам, учыненых групай асобаў (злосным хуліганстве), то бок у злачынстве, прадугледжаным часткай 2 артыкулу 339 КК Рэспублікі Беларусь».
Шкода пацярпелым кампенсаваная, а школьнікі прызналі віну.
Арсен Рудэнка belsat.eu
