Рада ЕЗ будзе размаўляць і аб спрыянні расейскай агрэсіі з боку рэжыму Лукашэнкі.
Рада Еўразвязу ў замежных справах збіраецца 18 сакавіка, каб абмеркаваць расейскую агрэсію, а таксама стан рэчаў з правамі чалавека ў Беларусі.
«У пачатку паседжання міністры замежных справаў краінаў ЕЗ правядуць нефармальны абмен думкамі праз відэасувязь з дзяржаўным сакратаром Злучаных Штатаў Амерыкі Энтані Блінкенам», – паведамляе прэс-служба Рады ЕЗ.
Таксама Рада ў замежных справах абмяркуе расейскую агрэсію супраць Украіны пасля нефармальнага абмену думкамі з міністрам замежных справаў Украіны Дмытром Кулэбам у пачатку дыскусіі.
,,«Рада абмяняецца думкамі аб апошніх падзеях у Беларусі, засяродзіўшыся на пагаршэнні сітуацыі з правамі чалавека і падтрыманні беларускім рэжымам агрэсіўнай вайны Расеі супраць Украіны», – гаворыцца ў прэс-рэлізе.
Напярэдадні адзінага дня галасавання ў Беларусі Рада ЕЗ падкрэсліла, што бачыць рэпрэсіі перад выбарамі і «салідарная з беларускім народам і па-ранейшаму поўная рашучасці мабілізаваць усе сродкі для падтрымання яго імкнення да міру і дэмакратыі».
На парадку дня і сітуацыя на Блізкім Усходзе, «уключаючы падзеі на месцах і ў рэгіёне ў цэлым».
Арсен Рудэнка belsat.eu
