Увесь персанал – людзі з інваліднасцю.
7 красавіка ў Варшаве распачынае працу першая кавярня праекту беларускага сацыяльнага прадпрымальніка і актывіста Аляксандра Аўдзевіча «Інклюзіўны барыста».
Кавярня размесціцца па адрасе: Stefana Okrzei, 8. На яе базе будзе таксама створаная прастора крэатыўнага ўзаемадзеяння людзей з дадатковымі патрэбамі і людзей без інваліднасці.
Увесь персанал у кавярні, як і ва ўсіх установах праекту «Інклюзіўны барыста» – людзі з інваліднасцю.
Першыя кавярні «Інклюзіўны барыста» Аляксандр Аўдзевіч адкрыў у беларускіх гарадах – Лідзе, Менску, Берасце, Магілёве. Пасля 2020 года Аўдзевіч быў вымушаны з’ехаць з Беларусі, каб пазбегнуць рэпрэсіяў.
У Варшаве ў рамках праекту беларуса ў 2022 – 23 гадах працавала школа «Інклюзіўны барыста», у якой 10 людзей з інваліднасцю атрымалі прафесію барыста. У 2023 годзе таксама ў Варшаве прайшлі два фестывалі Inclusive Barista Coffee Festival, падчас якога прафесіі барыста навучыліся 30 людзей з інваліднасцю.
Па спасылцы – праграма адкрыцця першай кавярні «Інклюзіўны барыста» у Варшаве.
Аляксандр Аўдзевіч – бізнесовец, падарожнік, блогер, адзін са стваральнікаў інклюзіўнага асяроддзя ў Лідзе, Берасці ды Менску. З 2011 года ён мае інваліднасць, таму карыстаецца вазком. На ровары з ручным прывадам ён аб’ехаў паў-Еўропы.
Марыя Міхалевіч belsat.eu
