Нагадаем, што ў Беларусі застаецца некалькі соцень чалавек байцоў ПВК Вагнэра.
Тры тысячы былых байцоў прыватнай вайсковай кампаніі Вагнэра далучацца да чачэнскага спецназу «Ахмат». Пра гэта паведаміў кіраўнік Чачэніі Рамзан Кадыраў.
Паводле яго, гэта стала вынікам перамоваў з кіраўніцтвам ПВК Вагнэра. Вырашана, што ў чачэнскі спецназ уступяць тысячы былых байцоў ПВК Вагнэра разам з камандзірам Раціборам.
«Міністэрства абароны РФ ужо вылучыла неабходную колькасць вакансіяў у складзе падраздзялення. У бліжэйшы час будуць вырашаны ўсе арганізацыйныя пытанні, і байцы змогуць пачаць выкананне аператыўна-баявых задач», – сказаў Рамзан Кадыраў.
Паводле яго, рашэнне аб уваходжанні ў склад спецназа «Ахмат» вагнэраўцаў «з’яўляецца стратэгічна важным крокам ва ўмацаванні абараназдольнасці краіны і павышэння эфектыўнасці нашага падраздзялення».
Нагадаем, што ў Беларусі застаецца некалькі соцень чалавек байцоў ПВК Вагнэра, якія працягваюць навучаць лукашэнкаўскія войскі. Арганізацыя «BELPOL» расказала аб намеры ўладаў легалізаваць знаходжанне ў Беларусі расейскіх баевікоў праз службу ў войску па кантракце. А «BYPOL» паведамляе, што ў вёсцы Цэль пад Асіповічамі будуюць дом для вагнэраўцаў.
Якуб Хруст belsat.eu
