У сталіцы пазначаныя шэсць такіх камераў.
На сайце «Бяспечныя дарогі Беларусі» з’явілася мапа размяшчэння камераў назірання за транспартам у Менску. У апісанні да іх ёсць пазнака, што гэтыя камеры могуць выкарыстоўвацца для кантролю праходжання тэхагляду аўтамабіля, прыкмеціў партал Av.by.
Усяго на карце сталіцы пазначана шэсць камераў тыпу «RoadEye S01». Адзначаецца, што менавіта яны могуць аўтаматычна фіксаваць адсутнасць тэхагляду.
Вядома, што «лісты шчасця» са штрафамі за няпройдзены тэхагляд маглі прыходзіць і з іншых камераў, але гэта адбывалася толькі пасля таго, калі кіроўца трапіўся на перавышэнні хуткасці. Пасля гэтага супрацоўнік ДАІ ў ручным рэжыме правяраў факт праходжання тэхагляду і, калі яго не было, выпісваў дадатковы штраф.
На сёння штраф за няпройдзены тэхагляд для фізічных асобаў роўны 0,5 базавай велічыні (20 рублёў). За гэтае парушэнне, здзейсненае паўторна цягам года, трэба будзе заплаціць 2 базавыя. Для індывідуальных прадпрымальнікаў і юрыдычных асобаў штраф роўны 5 базавым велічыням.
Раман Шавель belsat.by
