Суддзю не збянтэжыла, што памер штрафу не адпавядае памеру пенсіі жанчыны.
Суд Партызанскага раёну Менску аштрафаваў вядомую грамадскую актывістку Ніну Багінскую на 2000 рублёў (50 базавых велічыняў). Як стала вядома «Белсату», падставай для абвінавачання стаў значок з выявай нацыянальнага сцяга, які быў на вопратцы Багінскай.
Тое, што Ніна Багінская мела на каўнерыку маленькі значок, міліцыянты кваліфікавалі як «несанкцыянаваны пікет». Суддзя Аляксандр Супічэнка пагадзіўся з міліцыянтамі. У сваёй пастанове ён напісаў, што «значок белага колеру з выявай белага і чырвонага колеру» падлягае знішчэнню, і пакараў спадарыню Багінскую матэрыяльна.
Суддзю не збянтэжыла, што памер штрафу ніякім чынам не адпавядае памеру пенсіі жанчыны, якая да таго ж мае шэраг цяжкіх захворванняў.
Гэта ўжо не першае пакаранне нязломнай актывісткі. Некалькі гадоў запар з ейнай пенсіі ўтрымліваюць грошы на пакрыццё штрафаў за грамадзянскую пазіцыю. Любімае лецішча Багінскай апісанае і выстаўленае на продаж за «даўгі» праз нясплачаныя штрафы.
Любоў Лунёва belsat.eu
