Ён узяты пад варту.
38-гадовага нарадзінца Марʼінай Горкі падазраюць у намеры ўступіць у ЗСУ. Пра ягонае затрыманне паведаміў Следчы камітэт Беларусі.
Паводле інфармацыі СК, мужчына працаваў пакавальнікам, пасля поўнамаштабнага расейскага ўварвання ва Украіну стаў шукаць магчымасць уступіць у ЗСУ. Сцвярджаецца, што ў сакавіку 2023 года ён спрабаваў прайсці мяжу і трапіць ва Украіну, за што быў прыцягнуты да адміністратыўнай адказнасці.
Мужчына нібыта звярнуўся ў амбасаду Украіны з прашэннем прыняць яго на службу добраахвотнікам, але яму адмовілі ў сувязі з адсутнасцю ўкраінскага грамадзянства. Пасля гэтага ён напісаў у чат-бот у Telegram.
«Падазраваны прапанаваў у якасці платы за грамадзянства падрыў чыгуначных шляхоў. Выказваючы рашучасць да здзяйснення тэракту, ён прасіў скаардынаваць ягоныя дзеянні», – заяўляюць у СК, сцвярджаючы, што пасля гэтага ён стаў «дзейнічаць праз Польшчу».
Мужчыну затрымалі працаўнікі ГУБАЗіКу. У дачыненні да яго працаўнікі следчага ўпраўлення Менску распачалі крымінальную справу паводле ч. 1 арт. 13 ч. 1 арт. 361.3 («Рыхтаванне да ўдзелу на тэрыторыі замежнай дзяржавы ва ўзброеным фармаванні») Крымінальнага кодэксу. Ён узяты пад варту.
Ася Саковіч belsat.eu
