Раней і Лукашэнка абяцаў, што расейцы «ніколі» не нападуць на Украіну з Беларусі.
Міністр замежных справаў нашай краіны Сяргей Алейнік заявіў, што «з тэрыторыі Беларусі не можа быць здзейсненая аніякая агрэсія». Ён сказаў так у інтэрв’ю расейскаму прапагандысцкаму агенцтву «РИА Новости». Чыноўнік не растлумачыў, як гэтыя «непарушныя пастулаты» спалучаюцца з фактам нападу расейскіх войскаў на Украіну з тэрыторыі Беларусі ў лютым 2022 года.
,,«Беларусь заўсёды была і застаецца міралюбіваю дзяржаваю. З тэрыторыі Беларусі ніколі не зыходзіла і не будзе зыходзіць пагроза. Згодна з нашаю Канстытуцыяй, з тэрыторыі Беларусі не можа быць здзейсненая аніякая агрэсія. Гэта непарушныя пастулаты», – заявіў кіраўнік МЗС Сяргей Алейнік.
Ён пры гэтым ніяк не згадаў факту ўварвання расейскіх вайскоўцаў ва Украіну з тэрыторыі Беларусі ў пачатку поўнамаштабнай вайны ў 2022 годзе і запускі ракетаў з нашай краіны.
У 2020 годзе ў інтэрв’ю ўкраінскаму журналісту Дзмітрыю Гардону Лукашэнка абяцаў, што «ніколі» расейскія войскі не прыйдуць ва Украіну з тэрыторыі Беларусі, «асабліва са зброяй».
У інтэрв’ю расейскаму прапагандысцкаму агенцтву «РИА Новости» Алейнік таксама выказаў надзею на ўзнаўленне мірных перамоваў паміж Кіевам і Масквою.
«Будзем спадзявацца, што рана ці позна гэтыя перамовы ўзновяцца, але ўзновяцца сапраўды ў слушным фармаце, паміж Расеяй і Украінай, вядома, і мы сябе бачым часткай гэтага працэсу, бо гэты канфлікт непасрэдна закранае і Беларусь», – сказаў міністр.
Ён адзначыў, што Беларусь гатовая зладзіць такія перамовы ў сябе, аднак пакуль, з ягоных словаў, бракуе «палітычнай волі ўкраінскага кіраўніцтва».
Гаворачы пра «слушны фармат» перамоваў, Алейнік, імаверна, меў на ўвазе мірную канферэнцыю ў Швейцарыі, куды не запрасілі ані Расею, ані Беларусь, і такім чынам даў зразумець, што такі фармат «няслушны».
Міжнародная канферэнцыя мае адбыцца ў Швейцарыі 15–16 чэрвеня. Плануецца абмеркаваць «усёабдымны, справядлівы і трывалы мір для Украіны», а таксама тое, як гэтага міру дасягнуць. Як паведамлялася, на канферэнцыю будуць запрошаныя да 100 краінаў.
Сцяпан Кубік belsat.eu
