Захоўваецца тэндэнцыя на паўторнае затрыманне і асуджэнне асобаў, ужо пацярпелых ад рэпрэсіяў.
Праваабаронцы «Вясны» зрабілі агляд рэпрэсіяў за красавік 2024 года. З іхнае справаздачы вынікае, што цягам красавіка лукашэнкаўскі рэжым асудзіў не менш як 161 асобу на падставе крымінальных артыкулаў паводле палітычных справаў.
Лідарам у палітычных крымінальных справах стаў Менск (асуджаныя 83 асобы), на другім месцы – Берасцейшчына (36 асобаў), на трэцім месцы – Гарадзеншчына, дзе былі асуджаныя 12 асобаў. Пасля ідуць Гомельшчына і Менская вобласць (асуджаная 10 асобаў у кожнай). Найменей палітычных справаў зафіксавана на Магілёўшчыне (8) і Віцебшчыне (2).
Паводле ацэнак праваабаронцаў «Вясны», у агульнай колькасці асуджаных 111 – гэта мужчыны, 50 – жанчыны.
Адной з тэндэнцыяў крымінальнага пераследу праваабаронцы адзначаюць паўторнае затрыманне грамадзянаў, якія раней ужо пацярпелі ад рэпрэсіяў.
Раман Шавель belsat.eu
