«Еўрапейскі праект ніколі не будзе поўным без свабоднай Беларусі».
Святлана Ціханоўская стала лаўрэатам прэміі «Еўрапеец года». Гэта адна з самых прэстыжных прэміяў, якая ўручаецца дацкім аддзяленнем Міжнароднага еўрапейскага руху, паведамляе Офіс Ціханоўскай.
Узнагарода прысуджаецца кожны год асобам, якія зрабілі значны ўклад у еўрапейскую інтэграцыю, развіццё еўрапейскага грамадства і прасоўванне агульначалавечых каштоўнасцяў. Раней еўрапейцамі года былі прызнаныя Уладзімір Зяленскі, Эмануэль Макрон, прэм’ер-міністр Даніі Метэ Фрэдэрыксен і іншыя.
Святлана Ціханоўская заявіла на цырымоніі ўручэння, што Беларусь была часткай еўрапейскай супольнасці на працягу стагоддзяў і еўрапейскі праект не будзе поўным без свабоднай Беларусі.
«Толькі ў Еўропе Беларусь зможа квітнець і поўнасцю рэалізаваць свой патэнцыял. Толькі ў Еўропе Беларусь зможа захаваць сваю незалежнасць і пабудаваць дэмакратычныя інстытуты, якія будуць служыць народу, а не ўзурпатарам. Мы, беларусы, можам зрабіць свой унёсак у развіццё Еўропы. З нашай унікальнай культурай, цудоўным геаграфічным становішчам, адкрытым і працавітым народам. Я ўпэўнена, што еўрапейскі праект ніколі не будзе поўным без свабоднай Беларусі і суверэннай Украіны», – сказала Ціханоўская.
Ася Саковіч belsat.eu
