Беларусь таксама не хацела гуляць з Літвой.
Літва адмовілася гуляць у футбол з Беларуссю і патрапіла пад санкцыі УЕФА. У федэрацыі футбола Літвы пры гэтым заявілі, што гэта не самае галоўнае, важна было выказаць пазіцыю супраць вайны і агрэсараў. Разбіраемся, што адбылося.
Перад пачаткам лёсавання адборачнага турніру Чэмпіянату Еўропы 2025 сярод жаночых нацыянальных зборных ЛФФ (Літоўскі футбольны саюз) прасіў развесці Літву і Беларусь па розных групах, але атрымаў адмову.
Прадстаўнікі літоўскага футболу заявілі, што выключаюць сустрэчы з беларускімі камандамі на афіцыйным узроўні, нават калі самі пацярпяць ад гэтага. У выніку Беларусь і Літва разам з камандамі Кіпра і Грузіі аказаліся ў адной групе дывізіёна «C».
У першых гульнях літоўкі набралі чатыры пункты ў гульнях з Грузіяй, а беларускі двойчы абыгралі Кіпр. Пасля гэтага ЛФФ уключыў рэжым байкоту. Зборная Літвы павінна была правесці паядынкі з Беларуссю 31 траўня і 4 чэрвеня, аднак гэтыя матчы афіцыйна адмененыя. Гэта пацвердзіла УЕФА ў афіцыйным лісце ў Літоўскую федэрацыю футбола. Таксама зацверджаны санкцыі, якія будуць чакаць Літоўскую федэрацыю футбола – у абедзвюх сустрэчах літоўцам будуць залічаны тэхнічныя паразы з вынікам 0:3, а федэрацыя аштрафаваная на 5 тысяч еўра.
,,«Нарэшце гэтае пытанне афіцыйна вырашана, і цяпер можна глядзець наперад. Мы атрымалі такія санкцыі, якія маглі сабе ўявіць, і самае галоўнае, што для нашай зборнай не зачынены шлях да фінішу ў адборы да чэмпіянату Еўропы і згуляць два апошнія матчы, а выйграўшы там, мы можам і думаць пра другое месца ў групе і магчымасць прайсці ў наступны этап. Тут не галоўныя санкцыі і грашовыя штрафы, важна было яшчэ раз нагадаць пазіцыю ЛФФ адносна вайны і агрэсараў», – сказаў прэзідэнт ЛФФ Эдгарас Станкявічус.
Цяпер Беларусь набрала 12 пунктаў і зойме першая месца ў сваёй адборачнай групе. Літве будзе дастаткова атрымаць адну перамогу ў двух гульнях супраць Грузіі і Кіпра, каб аказацца на другой пазіцыі і таксама прайсці далей.
Як стала вядома «Белсату» ад нашых крыніцаў сама зборная Беларусі, якую трэнуе Юрый Малееў, таксама не збіралася гуляць з Літвой. Пры гэтым Беларусь не рабіла ніякіх заяў, а чакала дзеянняў з боку Літвы. На гэтыя тэрміны (30 траўня – 2 чэрвеня), калі былі запланавалі гульні з Літвой, у планах зборнай Беларусі быў выезд у Тэгеран, на 2 таварыскія гульні супраць зборнай Ірану.
Нашыя крыніцы паведамляюць, што за тое, каб не гуляць з Літвой выступіў былы кіраўнік АБФФ Уладзімір Базанаў. Цяпер ён адказвае за жаночы футбол і з 20 лістапада 2020 года знаходзіцца ў санкцыйных спісах Літвы, Латвіі і Эстоніі.
Гэта ўжо другі раз, калі Літва пазбягае сустрэч з Беларуссю.
Нагадаем, што ў 2023 годзе нацыянальная каманда Беларусі заняла апошняе, 4-е месца ў групе С3 Лігі нацый і мусіла змагацца на этапе плей-аўт за права ў наступным розыгрышы турніру згуляць Лізе «С» супраць Літвы. Гэты матч быў прызначаны на 24 сакавіка і павінен быў адбыцца ў Вільні. Але літоўскі бок заявіў, што на тэрыторыі Літвы гэты паядынак дакладна не адбудзецца.
Літва ўступіла ў закрытыя перамовы з УЕФА, прыняўшы ў выніку не самыя выгадныя ўмовы. У выніку Беларусь захавала месца ў дывізіёне «С», а Літва гуляла адборачныя гульні супраць Гібралтару. З гэтай сітуацыі Літва выйшла з гонарам, яна выйграла абодва матчы плэй-аўту, і не толькі выйшла ў дывізіён «С», але і пазбегла сустрэч з Беларуссю.
Пасля вайсковай агрэсіі Расеі супраць Украіны і падтрымкі яе з боку Беларусі спартоўцы з Расеі і Беларусі ў большасці відаў спорту патрапілі пад санкцыі. Ім было забаронена выступаць на міжнародных спаборніцтвах. Але ў футболе для зборнай Беларусі зрабілі выключэнне. Беларускія зборныя і клубы могуць выступаць на міжнароднай арэне, праўда, спаборніцтвы не могуць адбываецца на тэрыторыі Беларусі. Але і тут ужо зроблена выключэнне. Так мужчынскія зборныя Беларусі і Расеі згуляюць у Менску 7 чэрвеня. Для беларускай каманды гэта будзе першая гульня на сваёй тэрыторыі ўпершыню з 2021 года. Дазвол на гэтую гульню каманды атрымалі ад ФІФА.
Нагадаем, што ФІФА і яе структуры даўно не звяртаюць увагі на правы чалавека, інакш бы не было чэмпіянатаў свету ў Расеі і Катары, буйных турніраў у Саудаўскай Аравіі ды шмат яшчэ чаго. Цяпер жа кіраўніцтва Расеі і Беларусі стараецца абысці накладзеныя на іх санкцыі, і час ад часу ў іх гэта выдатна выходзіць, асабліва ў беларускага боку – з прадстаўнікамі рэжыму Аляксандра Лукашэнкі вядуць размовы ў ФІФА, не толькі супрацоўнічаюць на ўсіх кірунках, але і прызнаюць як афіцыйную ўладу ды прыкрываюць, калі беларускі бок абыходзіць санкцыі.
Як адзначалася вышэй, большасць дэмакратычных краінаў пазбягае гульняў з Беларуссю і Расеяй. Таму дзіўным выглядае рашэнне Ізраілю правесці таварыскую гульню супраць Беларусі. Матч пройдзе ў Вугоршчыне 11 чэрвеня і мусіць адбыцца пры пустых трыбунах.
Цікава, што на гульні супраць Расеі і Ізраілю галоўны трэнер зборнай Беларусі Карлас Алёс Фэрэр выклікаў Захара Волкава і Рамана Юзэпчука, хоць яны выступаюць за расейскія «Хімкі», якія адкрыта падтрымліваюць вайну.
Алесь Ляўчук belsat.eu
