Прэм’ер-міністр прыехаў у вёску, каля якой быў паранены польскі памежнік.
Прэм’ер-міністр Польшчы Дональд Туск 29 траўня падчас прэс-канферэнцыі ў Дубічах Царкоўных заявіў пра планы аднавіць буферную зону на мяжы з Беларуссю шырынёй каля 200 метраў, а таксама накіраваць усе даступныя сродкі на абарону мяжы, піша Onet.pl.
,,«Я хачу, каб гэта дайшло да кожнага. Тут няма месца ні для якіх перамоваў. Можна выкарыстоўваць усе даступныя метады, польскую мяжу трэба абараняць», – сказаў Дональд Туск.
Гэты заклік паўтарыў віцэ-прэм’ер Польшчы, кіраўнік Мінісэрства нацыянальнай абароны Уладзіслаў Касіняк-Камыш:
,,«Усе сродкі ў вашым распараджэнні».
Візіт прэм’ер-міністра, кіраўніка Міністэрства нацыянальнай абароны і кіраўніка МЗС на мяжу выкліканы нядаўнім інцыдэнтам, падчас якога польскі жаўнер атрымаў нажавое раненне.
Здарэнне адбылося ў аўторак, 28 траўня, на польска-беларускай мяжы, недалёка ад Дубічаў Царкоўных у Падляскім ваяводстве. У выніку нападу мігрантаў пацярпелі афіцэры польскай памежнай службы. Аднаго з іх ударылі разбітай бутэлькай, яшчэ аднаго паранілі інструментам, да якога быў прымацаваны нож. Вайсковец павінен быў перашкодзіць мігранту перасекчы мяжу, пасля чаго на яго напалі. Інцыдэнт адбыўся прыкладна ў 4.30 па польскім часе.
«Падчас выканання заданняў, патрулявання ўздоўж мяжы, салдат атрымаў нажавыя раненні ад мігранта, які знаходзіўся з беларускага боку», – паведаміла маёр Магдалена Касціньска, прэс-сакратарка 16-й Паморскай механізаванай дывізіі. Яна дадала, што зламыснік прасунуў руку ў шчыліны паміж пралётамі сталёвага барʼеру і такім чынам нанёс жаўнеру ўдар у вобласць рэбраў.
Дональд Туск паведаміў, што паранены салдат і ягоная сям’я знаходзяцца пад добрым наглядам. Па словах намесніка кіраўніка Міністэрства нацыянальнай абароны Цэзары Томчыка, стан жаўнера цяжкі.
Віцэ-прэм’ер і кіраўнік Міністэрства нацыянальнай абароны Уладзіслаў Касіняк-Камыш назваў напад на польскага жаўнера «бандыцкім»:
,,«Гэта сітуацыя, якая з кожным днём становіцца ўсё больш складанай, гэта арганізаваная аперацыя, якую праводзяць беларускія службы», – сказаў віцэ-прэмʼер.
Паводле польскай Памежнай аховы, з 24 па 27 траўня больш за 630 чалавек спрабавалі незаконна мінуць польска-беларускую мяжу. Паводле Падляскага памежнага атраду, з пачатку года на ўчастку мяжы ў гэтым рэгіёне былі зафіксаваныя больш за 13 тысяч спробаў незаконнага пераходу мяжы.
З 24 да 27 траўня польскія памежнікі і паліцыя затрымалі 11 чалавек за дапамогу ў арганізацыі незаконнага мінання мяжы. Сярод іх шасцёра грамадзян Украіны, два – Туркменістану і тры беларусы. З пачатку 2024 года затрыманыя 176 памагатых і арганізатараў незаконнай міграцыі.
Як пісаў «Белсат», для мігрантаў плот на мяжы Польшчы з Беларуссю не ёсць праблемаю. Яны рассоўваюць загароды і з дапамогаю лесвіцы праходзяць калючы дрот за плотам. Гэта здымаецца на відэа і публікуецца ў адкрытых групах для мігрантаў у «Telegram». У гэтых групах таксама пішуць рэкамендацыі наконт праходжання мяжы, арганізатары нелегальнай міграцыі знаходзяць кліентаў, публікуюць свае прапановы ды іншае.
Буферная зона на мяжы – тэрыторыя, якая раздзяляе дзяржавы і забяспечвае адсутнасць агульнай мяжы і кантакту ўзброеных сілаў.
Марыя Міхалевіч belsat.eu
