Паводле Падаляка, Пуцін праста агучыў «стандартны набор агрэсара».
Дарадца кіраўніка Офісу прэзідэнта Міхайла Падаляк пракаментаваў заяву Уладзіміра Пуціна наконт умоваў пачатку мірных перамоваў.
Уладзімір Пуцін 14 чэрвеня заявіў, што для пачатку мірных перамоваў Украіна мусіць вывесці войскі з Данецкай, Луганскай, Запарожскай і Херсонскай вобласцяў – не толькі з тых частак, якія кантралюе Расея, а і з тых, кантроль над якімі захоўвае Украіна. Таксама запатрабаваў «нейтральны, пазаблокавы, бяз’ядравы статус Украіны», яе «дэмілітарызацыю і дэнацыфікацыю», скасавання ўсіх заходніх санкцыяў супраць Расеі.
Дарадца кіраўніка Офісу прэзідэнта Міхайла Падаляк заявіў, што насамрэч ніякіх новых «мірных прапановаў» Расеі не існуе – Пуцін праста агучыў «стандартны набор агрэсара».
,,«Яго змест цалкам канкрэтны, вельмі абразлівы для міжнароднага права і абсалютна красамоўна сведчыць аб няздольнасці цяперашняга расейскага кіраўніцтва адэкватна ацэньваць рэаліі», – зазначыў прадстаўнік Офісу прэзідэнта Украіны.
Падаляк зазначыў, што, па сутнасці, патрабаванні Масквы выглядаюць наступным чынам: Украіна мусіць аддаць свае тэрыторыі, адмовіцца ад суверэнітэту і пакінуць сябе безабароннай, а Захад павінен зняць санкцыі і прызнаць перамогу Расеі.
Паводле Падаляка, Пуцін хоча не спыніць вайну, «не плаціць за гэтую вайну і працягваць яе ў новых фарматах». Прадстаўнік Офісу прэзідэнта Украіны лічыць гэтую прапанову поўнай прафанацыяй і заклікае не ўспрымаць яе ўсур’ёз.
Заяву Пуціна таксама пракаментаваў генеральны сакратар NATO Енс Стольтэнбэрг. Ён выказаў думку, што на самой справе «мірныя прапановы» Крамля сведчаць пра намер РФ узмацняць агрэсію і пашыраць акупацыю ўкраінскіх земляў.
,,«Гэта не Украіна павінна адводзіць войскі з украінскай тэрыторыі, гэта Расея павінна выводзіць свае войскі з акупаванай украінскай зямлі», – цытуе Стольтэнбэрга УНІАН.
Глеб Нержын belsat.eu
