У Магілёве адразу пяцярых асудзілі за ўдзел у пратэстах 2020-га
18.06.2024, 13:58
Суд Ленінскага раёну Магілёва. (Фота: Белсат)
podpis źródła zdjęcia
Аднаму абвінавачанаму прысудзілі 2 гады калоніі, астатнім прызначылі «хімію» або «хатнюю хімію».
Праваабарончы цэнтр «Вясна» паведамляе, што 13 чэрвеня ў судзе Ленінскага раёну Магілёва пяцярых абвінавачаных асудзілі паводле ч. 1 арт. 342 Крымінальнага кодэксу («Арганізацыя і рыхтаванне дзеянняў, што груба парушаюць грамадскі парадак, або актыўны ўдзел у іх»).
Суд Ленінскага раёну Магілёва. (Фота: Белсат)
Суддзя Наталля Панасенка ўсіх фігурантаў справы прызнала вінаватымі ва ўдзеле ў паслявыбарчых пратэстах і выхадзе на праезную частку.
Андрэю Цімоніну прызначылі два гады калоніі ва ўмовах агульнага рэжыму; Валерыю Іўчыну і Дзянісу Котаву – два гады і шэсць месяцаў з накіраваннем у папраўчую ўстанову адкрытага тыпу («хіміі») кожнаму; Святлане Котавай і Міхаілу Пішчалу – два гады абмежавання волі без накіравання ў папраўчую ўстанову адкрытага тыпу («хатняй хіміі») кожнаму.
Валер Іўчын, а таксама Дзяніс і Святлана Котавы маюць на ўтрыманні непаўналетніх дзяцей. Андрэй Цімонін, Дзяніс Котаў і Валер Іўчын «прымалі ўдзел у незаконных масавых мерапрыемствах не аднойчы», што суд палічыў абцяжлівымі абставінамі.