Яна вярнула ва ўжытак дзясяткі імёнаў беларускіх рэпрэсаваных пісьменнікаў і дзеячаў эміграцыі.
Памерла пісьменніца і даследчыца беларускай літаратуры, адна з заснавальніц і шматгадовая сябра Рады Згуртавання беларусаў свету «Бацькаўшчына» Лідзія Савік, паведамляе Zbsb.info. Сёлета ёй споўнілася 88 гадоў.
Лідзія Савік шмат гадоў працавала старшым навуковым супрацоўнікам Інстытута літаратуры імя Янкі Купалы НАН Беларусі, была прафесарам Беларускага дзяржаўнага ўніверстэта культуры і мастацтваў, дзе выкладала беларускую літаратуру. Лідзія Сымонаўна таксама з’яўлялася сябрам Міжнароднай асацыяцыі беларусістаў і старшынёй камісіі па вяртанні спадчыны беларускіх пісьменнікаў.
,,«Менавіта дзякуючы яе карпатлівай працы, у тым ліку з архівамі КДБ, да якіх яна на пачатку 90-х атрымала доступ, у культурны ўжытак вярнуліся дзясяткі імёнаў і літаратурных твораў беларускіх рэпрэсаваных пісьменнікаў і дзеячаў эміграцыі», – піша Згуртаванне беларусаў свету «Бацькаўшчына».
Лідзія Савік выдала некалькі манаграфій, прысвечаных праблемам развіцця беларускай літаратуры, культавую кнігу «Пакліканыя: літаратура беларускага замежжа« (2001) і некалькі кніг у суаўтарстве на сумежную тэматыку. Таксама яна мае больш за 300 артыкулаў, рэцэнзіяў і энцыклапедычных артыкулаў.
Згуртаванне беларусаў свету «Бацькаўшчына» (ЗБСБ) было ўтворанае ў 1990 годзе і цягам 30 гадоў сваёй дзейнасці аб’ядноўвала арганізацыі беларускай дыяспары з 28 краін краін свету і беларусаў унутры краіны.
24 верасня 2021 года ЗБСБ было ліквідаванае, згодна з прысудам Вярхоўнага суда РБ, па справе, ініцыяванай Міністэрствам юстыцыі Рэспублікі Беларусь.
Раман Шавель belsat.eu
