Жаданне Польшчы цалкам закрыць мяжу з Беларуссю, відаць, напалохала рэжым.
Арганізацыя былых беларускіх сілавікоў «BELPOL» сцвярджае, што ў Беларусі пастанавілі адправіць старшыню Дзяржаўнага мытнага камітэту Уладзіміра Арлоўскага ў Брусель (Бельгія).
Падставай называецца ўдзел у 143/144 сесіі Рады Сусветнай мытнай арганізацыі з 27 па 29 чэрвеня 2024 года.
«Паводле нашых звестак, галоўнай задачай гэтай камандзіроўкі ёсць лабіяванне пытання наконт аднаўлення функцыянавання пунктаў пропуску на межах Еўрапейскага Звязу з Беларуссю», – заяўляюць прадстаўнікі «BELPOL».
Цяпер у Беларусі з суседнімі краінамі ЕЗ працуюць чатыры пункты пропуску: два літоўскія, адзін латвійскі і адзін польскі. Прычым праз апошні праходзіць амаль у чатыры разы больш грузаў, чым праз тры астатнія, разам узятыя. І закрыццё яго можа выклікаць транспартны калапс.
У канцы жніўня 2023 года міністры ўнутраных справаў Літвы, Латвіі і Польшчы дамовіліся, што межы з Беларуссю могуць быць закрытыя ў выпадку ўзброенага інцыдэнту (тады на тэрыторыі Беларусі была вялікая колькасць баевікоў ПВК Вагнэра) або пры прарыве нелегальных мігрантаў.
Эскалацыя канфлікту паміж Варшавай і Менскам, выкліканая забойствам на мяжы адным з мігрантаў польскага жаўнера, прывяла да таго, што 22 чэрвеня міністр замежных справаў Польшчы Радослаў Сікорскі заявіў: разглядаецца магчымасць закрыць рэшту памежных пераходаў з Беларуссю.
На гэта адрэагаваў міністр замежных справаў Беларусі Сяргей Алейнік.
Кіраўнік дыпламатычнага ведамства зазначыў, што закрыццё межаў будзе найперш скіраванае супраць грамадзянаў ЕЗ, СНД і «Вялікай Еўразіі» і прывядзе да эскалацыі:
,,«Вядома, гэтыя заклікі вядуць да эскалацыі. […] Тут трэба дакладна разумець, што гэтыя заклікі і гэтыя прапановы скіраваныя не толькі і не столькі супраць польскіх грамадзянаў і польскіх рэгіёнаў, эканамічнага развіцця польскіх рэгіёнаў, колькі супраць многіх іншых грамадзянаў ЕЗ, СНД і так званай Вялікай Еўразіі».
Сяргей Алейнік перакананы, што закрыццё ўсіх памежных пераходаў не спыніць плыні нелегальных мігрантаў, і заклікаў да дыялогу.
,,«Калі Польшча да гэтага гатовая, хаця б у памежных пытаннях ці пытаннях памежнай супрацы, што згарнулі з ініцыятывы польскага боку і іншых еўрапейскіх партнёраў, мы гатовыя гэтыя тэмы абмяркоўваць», – зазначыў міністр.
Ася Саковіч belsat.eu
