Сям’я Айдоса Садыкава вінаваціць у ягонай гібелі прэзідэнта Такаева.
Казахстанскі апазіцыйны журналіст, блогер і актывіст Айдос Садыкаў памёр у кіеўскай лякарні праз 13 дзён пасля ўзброенага нападу на яго. Пра гэта паведаміла ў Facebook ягоная жонка.
,,«Айдос аддаў сваё жыццё за Казахстан, прыняў пакутніцкую смерць ад рукі кілераў. Трынаццаць дзён Айдос змагаўся за жыццё ў рэанімацыі, але цуду не здарылася. Ягоная смерць на сумленні Такаева», – заявіла ўдава, журналістка Наталля Садыкава.
Замах на Айдоса Садыкава быў здзейснены 18 чэрвеня ў Шаўчэнкаўскім раёне Кіева: невядомы стрэліў у апазіцыйнага журналіста, калі той быў у аўтамабілі. Садыкаў з цяжкімі раненнем трапіў у рэанімацыю.
У Офісе генеральнага пракурора Украіны паведамілі, што праз смерць казахстанскага журналіста следчыя змянілі кваліфікацыю злачынства. Цяпер падазраваных абвінавачваюць у заказным наўмысным забойстве, учыненым групай асобаў (п.п. 11, 12 ч. 2 арт. 115 Крымінальнага кодэксу Украіны).
Паводле звестак следства, да забойства датычныя двое грамадзянаў Казахстану. Пасля замаху яны паспелі ўцячы праз мяжу з Малдовай. Адзін з іх пазней быў затрыманы ў Казахстане, нібыта пасля таго, як ён сам звярнуўся ў органы ўнутраных справаў.
Глеб Нержын belsat.eu
