Вайна ва Украіне. Падсумоўваем асноўныя падзеі на вечар 7 ліпеня.
«Белсат» падводзіць вынікі 865-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 7 ліпеня чытайце ў нашым аглядзе.
На поўначы Харкаўскага раёну працягваюцца баі на ўчастку фронту паміж сёламі Глыбокае і Ліпцы.
Аналітыкі праекту Deepstate пішуць, што Збройныя сілы Украіны пачалі адкідаць праціўніка ў Глыбокім.
Прарасейскі тэлеграм-канал «Рыбарь» паведамляе, што ЗСУ, пацягнуўшы рэзервы, адбілі тэрыторыю сельгаспрадпрыемства на паўночных ускрайках сяла.
Праўкраінскі «Говорять Снайпер» адзначае, што цяпер войскі РФ, намагаюцца скарыстацца перавагай у артылерыі і жывой сіле, каб адбіць пазіцыі, але пакуль не маюць поспеху.
У Чугуеўскім раёне баявыя дзеянні ідуць на тэрыторыі гораду Ваўчанск і ў ягоных ваколіцах. Абодва бакі маюць невялікія прасоўванні, але істотна змяніць сітуацыю ў свой бок пакуль не ўдаецца ніводнаму з праціўнікаў.
У Генеральным штабе Збройных сілаў Украіны паведамілі, што на купянскім і ліманскім кірунках цягам апошніх содняў Сілы абароны краіны адбілі не менш за 27 атак праціўніка ў ваколіцах населеных пунктаў Сынькоўка, Петрапаўлаўка, Стэльмахаўка, Грэкаўка, Макееўка, Неўскае, Церны і Торскае.
Між тым у Deepstate гавораць, што расейцы прасунуліся ў сяла Пішчанае і каля Макееўкі.
Прарасейскі канал «Два майора» удакладняе, што ў Пішчанае УС РФ зайшлі з паўднёвага ўсходу, перад гэтым прасунуўшыся на ўчастку фронту шырынёй да 5 кіламетраў на глыбіню да 3,25 (з захаду ад лініі населеных пунктаў Табаеўка – Крухмальнае.
Такім чынам расейцы істотна наблізіліся да ракі Аскіл, што ў далейшым, пры захаванні такой дынамікі, пагражае атачэннем плацдарму ЗСУ на левым беразе.
На сівэрскім кірункі – выступ па фронце з поўдня ад ракі Сівэрскі Данец – Узброеныя сілы РФ атакуюць каля сёлаў Спірнае і Выемка. Канал «Два майора» сцвярджае, што войскі РФ усё ж змаглі заняць першы населены пункт, які раней неаднаразова пераходзіў з рук у рукі.
На краматорскім кірунку, паводле Генштабу ЗСУ, ціск расейцаў засяроджаны ў ваколіцах населеных пунктаў Калінаўка, Часаў Яр, Клішчыеўка, Іванаўскае і Андрэеўка.
Па інфармацыі Deepstate, УС РФ прасунуліся каля Калінаўкі і Часавага Яру.
Прарасейскія крыніцы адзначаюць, што такім чынам войскі РФ намагаюцца падцягнуць паўночны фланг кірунку да каналу Сівэрскі Данец – Данбас.
На тарэцкім кірунку атакі Узброеных сілаў РФ лакалізуюцца на ўсходзе аднайменнага гораду, а таксама ў прылеглых населеных пунктах.
У Міністэрстве абароны РФ заявілі пра захоп пасёлку Чыгары (частка Паўднёвага).
Таксама рух фіксуецца ў Паўночным, дзе пад кантроль войскаў РФ перайшла частка прыватнага сектару і асобныя шматпавярховыя дамы, і на ўсходніх ускрайках Дружбы.
Між тым найбольшая інтэнсіўнасць наступальных дзеянняў УС РФ па-ранейшаму лакалізуецца на пакроўскім кірунку, дзе яны рухаюцца на захадзе ад раней занятага гораду Аўдзееўка.
У Deepstate фіксуюць прасоўванні расейцаў у сяле Яўгенаўка, каля Лазувацкага і Навасёлаўкі Першай.
Прарасейскі тэлеграм-каналы паведамляюць пра рух каля населеных пунктаў Васход, Яснабродаўка і Карлаўка.
Ніжэй па фронце працягваюцца баі за Краснагораўку: тут расейцы паступова выціскаюць праціўніка з паўночна-заходняй часткі гораду.
Акрамя гэтага на курахаўскім кірунку войскі РФ атакуюць на ўскрайках сяла Канстанцінаўка – пакуль безвынікова.
У Запарожскай вобласці не назіраецца істотных зменаў: тут працягваюцца баі каля сёлаў Вэрбовае і Работына (ваколіцы гораду Арэхаў), але пакуль Сілам абароны Украіны ўдаецца стрымліваць праціўніка.
У Херсонскай вобласці расейцы намагаюцца выбіць ЗСУ з плацдармаў на левым беразе Дняпра і прылеглых астравах, але таксама не маюць поспеху.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
